إطلالة
حكايات ود البرعي
حكاية التعاون ..
توفيق جعفر
في صباح أحد الأيام حضر لود البرعي في بيته مع الصباح ، كانو خمسة من أهل ود المبارك، …
_ إتفضلوا جاي جاي الشاي يا معروف ..
إنبسطوا بعد أن جلسوا علي الشاي والعصير والكيك فقد جهز لهم معروف في دقائق معدودات ..
إبتدر حميدة ود مختار الحديث بقوله :
_ والله يا ود البرعي خيرك مدفق، ومعممنا كلنا في كل مناسبة، بتوزع علينا الأضاحي، والكساوي، والعملتو بعد النزوح شئ يفوق الخيال، ربنا يبسطك ويبارك في عمرك ومالك
لكن لسه قريتنا محتاجة خاصة بعد الحرب، وتري براك شايف المساكين كتروا والنازحين سكنوا معانا ..
فنحن فكرنا قلنا نعمل تعاون كبير، يكون فيهو سلع، سكر دقيق، زيت ..الخ
فرأيك شنو؟
رد ود البرعي بقوله :
لسه نسمع رأي ناس عبد الباقي وبشارة؟
_ والله كلام حميدة ياهو لكن بقول برضو تفرض حاجة علي كل مستطيع ما عاوزين حاجة من الحكومة …
ضحك ود البرعي قائلا :
تكون عشان الظلم بتاع توزيع الإعانات ولا شنو؟
اردف ود البرعي المعتمد بتاعنا فيهو خير كتير طوالي حول المرتشين للمحكمة وطلع قرار حاسب بيهو مدير التعاون والتموين في المحلية ..!
واصل ود البرعي ردا علي غرض الوفد :
_ كلامكم كلو صاح واضيف عليهو انو يكون في قسم يتم فيهو منح الملابس للفقراء واولادهم الطلبة في المدارس، وحأدعو لاجتماع عاجلا للجنة القرية نناقس المقترح بتاعكم دا، ونشوف دعم الدولة عشان يبقي تعاون مستمر ..
وافق اعضاء وفد القرية، وشكروا ود البرعي علي كرم الإستضافة وتفهم وتعاونو الكبير علي إنشاء تعاون ود المبارك ..
ونواصل
