صبري محمد علي (العيكورة) يكتب :
*تعال أقول ليك عمّك جهجهم كيف*
كثيراً ما كان يكرر فخامة رئيس مجلس السيادة أن علاقات السودان الخارجية ستُبنى علي مواقف تلك الدول من الحرب
(الكشّة) الأخيرة (لفخماتو) والتي أطاحت بالقيادة ومدني والإشارة وبحري وجنوب الخرطوم و(مُش عارف) المطار موقف شندي
البتاع
يعني حاجة كده فوق تصور العقل البشري
(فاااا)…..
المطاقشة دي عملت شنو يا (عب باسط)؟
أربكت حسابات دول ومنظمات إقليمية وعربية وبطريقة متسارعة (خااالص)
التقاء الجيوش
(مش عارف) ثعالب الصحراء بالفاشر
دنقلا
مدني
الحقوا متحرك الصياد
دعامة الضعين (فكوا البيرق)
و(حاجات بالشكل ده)
وعمك لااابد ولا كأنه عمل حاجة
يتلب ليك مساء البارح أو صباح اليوم (عليمو كريمو) يخاطب زملائه وجنوده بالقيادة العامة
يديها شبحة كده
مقر جهاز المخابرات
ويديلهم كلمتين حلوين من بيت الكلاوي لمن يهمه الأمر
تصور يا مؤمن …..
القحاطة والدعامة الذين ملؤوا الوسائط بالأمس بإستقالاتهم وتبريراتهم ومحاولة تبرئة ساحتهم من الدعم السريع
تصور عمّك قال ليهم شنو؟
*لا عندنا مفاوضات مع زول ولا عندنا صُلُح مع زول ولا عندنا زول إتمرد يجينا ولا عندنا واحد وقف مع التمرد بنقبله*
وإنشاء الله السودان خالي من التمرد
قبل أن يختمها وسط جنوده مكبراً الله أكبر الله أكبر
*أظن الكلام ده ما عايز ليهو درس عصُر*
تصور يا مؤمن …..
مجلس التعاون الخليجي والجامعة العربية يدينان التمرد والإعتداء على الأبرياء
*إنتا قادر تتخيل معاي*!
التغيرات التي حدثت منذ فجر الجمعة وحتى اللحظة في المواقف الخارجية و(لسسسه)
يا ما (حا تشوف) الوفود الحاجة الى العاصمة عبر مطار الخرطوم الدولي قريباً بإذن الله وكلهم سيدّعِي التعاطف ومقاسمتنا الجراح
لكن وين ….
يلقوها عند غافل
قال ليكم ….
*(ستُبني علاقاتنا الخارجية مع الدول بناءاً على مواقفها من الحرب)*
نقطة سطر جديد
وكل الشعب السوداني سيصطف خلف هذه الجُملة (الضُرُس)
*وزارة الخارجية*
البارحة عقدت مؤتمراً دعت له السفراء المعتمدين بالسودان شرحت وأبانت التطورات الأخيرة والإنتصارات
وكان مؤتمراً رائعاً أعاد لنا الأمل في الدبلوماسية السودانية
ناس قيااافة
وبدل حرير وكرفتات روعة
وكلام لا يقبل القسمة على إتنين .
نعود لنقول ….
ضبط البوصلة يبدأ من فوهة بندقية الجيش و (اليبقى عليّ أنا هين) وكلو مع البياض بظبط
ويظل الورق ورقاً
والحبر حبراً
وبعض القنوات الفضائية خمارات
وجنيف مدينة باردة
وجدة معبرنا لبيت الله الحرام
وترامب تاجر
والصين مصالح
و الروس وزنة ميزان
والسودان ثُريا
والبرهان دهب
والجيش كلام تاني
(جهجه حنانُنم ياخ)
أمسية الأحد
٢٦/جغماير(جبرة) ٢٠٢٥م
