دبوس حاااااار د. أحمد منصور المحامي يكتب :  ⭕ *يا سعادتو إبراهيم جابر سكان ولاية الخرطوم بيقولوا ليك دايرين الكهرباء …*

دبوس حاااااار

د. أحمد منصور المحامي يكتب :

⭕ *يا سعادتو إبراهيم جابر سكان ولاية الخرطوم بيقولوا ليك دايرين الكهرباء …*

كانت بالأمس الردود بالآلاف على مقال رجوع سكان ولاية الخرطوم لديارهم ولا اكون كاذباً إن قلت بالملايين …
وذلك إذا أدخلنا عائلات ممن ردوا علينا معهم فى الحصر …

*على العموم …*
كلهم أجمعوا على أن عودتهم لولاية الخرطوم مرهونة بعودة التيار الكهربائى إلى مناطقهم …
*وطبعاً ذي مااا عارفين رأي الدبوس فى ناس الكهرباااء …*
فهم أسوأ قطاع خدمي في البلاد …
وكان ماا عاجبكم كلامي ده اعملوا ليكم مؤتمر صحفي وعللوا فيه الأسباب …
عشان الكلام يبقى مؤسس …
*وأيضاً …*
هنالك من سكان ولاية الخرطوم من تعذر بي سبب تواجد البعوض وتوالده بكثرة في مناطقهم *( يعني بالواضح الما فاضح كده الجماعة ديل خايفين من الملاريا وحمى الضنك ) …*
*وبعضهم قال :*
هو الوزراء زااتم رفضوا الرجوع لي مبانى وزاراتهم …
نحن ديل البرجعنا شنووو ؟؟؟
*وهنالك …*
من طالب بدوريات للشرطة فى المناطق التى تقع في أطراف ولاية الخرطوم وذلك لتأمين أملاك المواطنين …
*يا سعادتو إبراهيم جابر …*
لابد من معالجة تلك الأشياء وبسرعة البرق حتى نضمن رجوع المواطنين إلى ولاية الخرطوم وإلى محلياتهم وحاراتهم ومربعاتهم …
*ورب الكعبة يا جماعة إشتقنا ليكم …*
*والله إشتقنا كمان شديد لى زحمة الخرطوم …*
*آآآآه …*
*ويا حليل زمان زمن الناس كانت بتنشد وبتغنى وبتقول :*
*يااا ربى متين نزور الخرتووووم …*

*️د. أحمد منصور المحامى …*