دبوس حااااار
د. أحمد منصور المحامي يكتب :
*صارت محلية أمبدة مكب لمسروقات الدعامة …*
الصورة أعلاه لشهداء أمبدة فى معركة العز والكرامة …
وعدد الشهداء الآن تضاعف أكثر من ذلك …
أمبدة حضارة …
أمبدة جدارة …
أمبدة جسارة …
أمبدة رجالة …
وناس أمبدة ماااا برضو الحقارة …
ديل البلو الدعامة …
وديل السكتو الحكااامة …
*يا ناس هووووووى …*
بكرة ما ينط لينا واحد ويقول :
ناس أمبدة سرقو اموالنا …
*لأنو …*
*ناس أمبدة أشراف ونضاف …*
*وناس أمبدة أطهار وعُفاف …*
*وشباب أمبدة بى أرواحهم ودماءهم حرسو مالهم وشرف نسوانهم …*
*ولكن …*
صارت أمبدة اليوم مستنقعاً ومأوى للمتمردين الفارين من جحيم الجيش السودانى وكمان من كل بقاع السودان عدا الولايات الغربية …
وعندما يأتون فارين ومعردين إلى محلية أمبدة يأتون محملين بالمنهوبات والمسروقات وكمان شاحننها فى الدفارات والجامبوهات …
*… أخيراً …*
*يا جمااااعة …*
هل تعلموا بأن معركة الكرامة مدورة ومولعة وجيوشنا متقدمة ومنتصرة فى أكثر من 27 محور …
ولكن محور أمبدة لليوم جامد فى مكان واحد …
ناس تكساس ثابتين فى مكان واحد ولم يتقدموا ….
ناس الغربية بقيادة سعادة اللواء الركن حاتم أحمد محمد أبن أمبدة وأسدها ومعه أركان حربه الأبطال قد اكملوا مهمتهم على أكمل وجه وراجين ناس تكساس يفارقوا الصينية بتاعة المنصورة حتى يلتقوا فى النقاط المحددة ومن ثم يتم الإنقضاض على سوق ليبيا وسوق أبوزيد وسوق قندهار ودار السلامات والقضاء نهائياً على المتمردين فى ولاية الخرطوم …
*ليكم الله يا ناس أمبدة …*
كل المحليات فى السودان إلتقت بجيشها جيش السودان العظيم ونزلت دموع الفرح من الملايين عدا أنتم …
كان الله فى عونكم يا مواطنى محلية أمبدة الأبطال …
قبل يومين حوالى 60 دانة فوق رؤوس منازلكم …
وهى بهذا العدد أو أقل بقليل فقط شبه يومياً عليكم …
حتى الإعلام الرسمى حاصر برامجه فقط فى أشخاص معينة لا يتعداها وفى منطقة ضيقة جداً من محلية أمبدة كل الناس حفظاها ذى جدول واحد وخمسة عشرة وحداشر …
*يا ناس الإعلام الرسمى …*
وين برنامجكم برنامج أفراح فى زمن الحرب من أفراح محلية أمبدة …
وين برنامجكم برنامج الكاميرا الحوامة (الجوالة) من الحوامة فى محلية أمبدة …
وين يا ناس القنوات الفضائية الرسمية زياراتكم لرموز محلية أمبدة الصامدين الراكزين كما فعلتم مع رموز المحليات الآخرين …
وين الإعلام الرسمى من تكايا محلية أمبدة كما تفعلون يا ناس القنوات الرسمية مع باقى المحليات فى ولايات السودان قااااطبة …
وين زياراتكم لمدراء الوحدات الإدارية فى المناطق الآمنة لمعرفة أحوال ناس أمبدة …
*الله فى …*
*️د. أحمد منصور المحامى …*
