🌹 إطلالة🌹 توفيق جعفر ================ حكايات ود البرعي زيارة مهمة لود المبارك ..!
🌹 إطلالة🌹
حكايات ود البرعي
زيارة مهمة لود المبارك ..!
عادة ما يأتي بعض أبناء القرية من العلماء والأساتذة ، والأطباء ..الخ، الذين يعملون في العاصمة، وخارج السودان ليقضوا إجازاتهم مع أهلهم وأسرهم هنا في ود المبارك ..!
لكن هذه المرة قطع إثنين من النوابغ العاملين في شأن الزراعة، والآخر يعمل في صندوق المصرف العربي في القاهرة ..
علي زكريا باحث زراعي يعمل في منظمة الأغذية والزراعة في السنغال، وأبوبكر كمال الذي يعمل في
المصرف ..
نزلا معا في منزل ود البرعي وأجتمعا معه ساعة كاملة ..
وقرر ود البرعي دعوة لجنة القرية لإجتماع طاريء وسريع ..!
إستمعت اللجنة بإصغاء تام لما قاله الشابان ..
وكان ملخص حديثهما المدعوم بالعلم أن موسما سيئا جدا متوقع بسبب الزيادة المضطردة في أسعار الحبوب وعموم المنتجات الغذائية المرتبطة بالزراعة كالذرة والقمح والسمسم ..الخ
ثم ضعف الموسم الزراعي الحالي، وتوزع الأمطار علي قلتها .. الخ
ولن يكفي الانتاج حوجة البلاد الفعلية الكلية ثم قارن الباحث علي زكريا نسبة الانتاج الكلي للحبوب في السودان مقارنة بالأعوام العشرة التي سبقت ..
موضحا الجفوة التي بدأت تتسع ..؟!
سال شيخ إدريس إمام الجامع سؤالا مباشرا عن ما يترتب علينا هنا إيه؟
أجابه المصرفي أبوبكر كمال قائلا :
_ دا هو الجابنا ليكم انا أخدت إجازة مخصوص تصادف إجازة علي زكريا عشان نقول ليكم يا أهلنا بإختصار تعملوا كالآتي:
صندوق كبير تجمعوا فيه مدخراتكم تخزنوا فيه الحبوب الغذائية قمح/ ذرة/ سمسم الخ ..
وتتعاونوا مع بعض في المعاش اليومي من خضروات يومية زي الطماطم/ البامية/ البطاطس ..الخ
وعندكم تجربة يا ود البرعي في التعاون قبل كدا
أضاف علي زكريا قائلا :
_ أهم حاجة واول حاجة نذكر بيها ربنا حابانا بمياه النيل مارة جنب بيوتنا كيف ننتج بالزراعة ..
ومرات كتيرة عندنا موية متوفرة لكن انتاجنا الزراعي ضعيف عارفين ليه؟
_ ما عارفين؟
زراعة بوعي بعلم بدراسة بتحضير جيد بمبيد كافي في زمنو ..!
_ دا بجيب إنتاج غزير ..
عشان كده حاننظم ليكم دورة زراعية عملية لمدة شهر طوالي مزارعينا يدخلوا الموسم جاهزين وعارفين ..
اعلن ود البرعي لجنة للدورة الزراعية من أربعة اعضاء برئاسة عبد اللطيف وعضوية تلاتة آخرين ..
ولجنة التجهيز الموسم الزراعي القريب برئاسته وعضوية خمسة ..
وأعلن ان ود المبارك ستكون نموذجا للقري المنتجة ..!
