شعر
الداير النظارة ،،،،،،،،،، يحلحل المِتلوِّي
يحرق روحو شان باقي القبيله يضوي
انت متين تقيف موقف مشرف وقوي؟
إلا نقوم انحنا ،،،،،، نقولك افعل وسوي؟
ناسك شافوا في حرفي البدوزنو حِدَّة
ماشافو الجروح ،،،، الشايلة هم المِدَّة
“ياصِدِّيقنا ” وينك ،،، من حروب الردة
عقب ما تجينا لو ماجيتنا وكت الشدة
وكت الغيرنا قعدوا عشان يفكوا الشفرة
تركت ابوعاقلة ناويلنا ونويت السفرة
ايَّا نظارة قعدت ، وناسا حققو طفرة
ناسنا انحنا ،،،،،،،، الا نَقَوِّمُن بالدفرة
ماسيناك دحين لي تحِلحِل المعقودة؟!
لي متين انت لابِد ،، و طلتك مفقودة؟
كيكل نارو كان ماجيت بنطفي وقودا
لكن تاني ،،،،،،، إلا تشوف قبيلة تقودا
يا ابوعاقلة اهلك ،،،،،،، ناس معظم شانُن
غير ولدوك يمين ،،،،،، ماسوو فعلا شانن
كيف تحلف تقول حربي وكتالي عشانن
وات مافي زول سفيه ماجبتو لي نسوانن
ماتقول شان ولدنا انحنا ما بنعترضك
زي ما حميدتي خاين انت خاين برضك
شان مال الملايش بعت اهلك وارضك
ما خليت سفيه ماجبتو يهتك عرضك
.
.
باحوت..
#السودان
#المقاومة_الشعبية_لدحر_المرتزقه
#جيشا_واحد_شعبا_واحد
