صلاح التوم من الله يكتب :
*بمناسبة عودة الكهرباء والماء …..الكهربا جات املوا الباغات*
ما يطلبه المستمعون
* اهدي الاغنية لوالي الخرطوم وأركان حربه :
نور بيتنا شارع بيتنا يوم ما جيتنا
مثل جديد
* يقول مثل سوداني : المي الحار ما لعب قعوي
ونقول : المي ام درمان ما لعب قعوي دعامي سجمان ..
نصيحة للدعامة
* مسيراتك الضلت غايتا .. وفقدت اهميتا ..
موصة واشرب مويتا ..
موية البحر
* يقول الشاعر ذو الرمة :
الم تر ان الماء يخبث طعمه
وان كان لون الماء ابيض صافيا
ونقول للشمات القحاطة الآفات :
نحن اكلنا الفول بموية البحر
وشربنا الشاي والقهوة بموية البحر
ما فينا زولا مات او انتحر
الكلام الما كلام
* أبلغ حديث لا تقول لي شعراء لا ادباء لا صحفيين لا سياسيين .. أبلغ حديث اللمبة لما تولع وتلعلع بالنور .. والماسورة لما تفتح خشما بالدر المنثور ..
درر عصر
* الماء اهون موجود واعز مفقود .. وعينا الدرس
صوت وصورة
* يا ماسورة يا أمورة .. معاك ( السلفي ) اجمل صورة
صدق الله العظيم
* وجعلنا من الماء كل شيء حي
( الأنبياء ٣٠ )
* وكان عرشه على الماء
( هود ٧ )
صلاح التوم من الله
الخميس ٢٣ يناير ٢٠٢٥
