خواطر قلم 150 د. مهندس سامي السر ابو زينب يكتب : *الباعام …والشغل المجاني وتغيير الشخصية*

خواطر قلم 150
د. مهندس سامي السر ابو زينب يكتب :

*الباعام …والشغل المجاني وتغيير الشخصية*

*المدخل نكتة*
⬇️⬇️
انا وابوي شغالين نصلح في الماسورة بالليل انا ماسك ليهو البطاريه وهو بحل في الصامولة المهم الصامولة غلبتو في النهاية قلت ليهو امسك البطاريه وانا أحل الصامولة مسك البطاريه وانا من اول محاولة الصامولة اتحلت معاي فجاة قشطني ليك كف قال لي شايف البطارية بمسكوها كيف ؟
تعليقي
⬇️⬇️
روووووعه
الله يرحم والدينا..
ابوي كان دائماً بصلح حاجات البيت بنفسو
عندو شنطه فيها كل شي..
وكان بيحب يشغلك باعام
(على قول محمد المازن سامى وبحكي ليكم قصتو معاي)
وانا ما كنت بحب الحركة دي كلو كلو…. كنت بتمرد عليها.. عندي اخوي نمرة اتنين دا ما شاء الله طبيب الان.. بالو طوييل واصلوا ما بقول لابوي لا.. فكان بيصبر… عشان كدا ابوي كان بحبوا جداً..وكان ابوي الله يرحمه جنو يشاغلني مشاغلة شديدة.. وبعتبرني ود مدلع.. وحقيقة انا أقرب للمهارات الفكرية من المهارات اليدوية منذ أن كنت طفلاً… المهم.. بعد احتكاكي بالتنمية البشرية والسلوك التنظيمى بذات في السلوك: تطوير العادات
وتغييرها وتعديل الأنماط… غيرت كتير جداً من شخصيتي… ودا أجمل ما في هذه العلوم تساعدك على فهم الآخرين بذات ابوك… وتساعدك على برهم الي آفاق عليا…. كمان جاء التغيير في لحظة نقلية الي محطة حلة كوكو.. في حلة كوكو الغازيه اول مرة اشتغل صيانة… دائماً بشتغل تشغيل في المحطات السابقة .. المهندس الميكانيكي لازم يشتغل صيانة… فاشتغلت أروع ايامي كمهندس صيانة في كوكو الغازية…. وطبعاً تعلمت الكثير جداً من فنيات الصيانة.. يا اخي كان عندنا كبير الملاحظين عمك عمر عباس الله يرحمه وينزل شائبيب رحمته على قبرهـ.. دا كان بشغل المفتاح البلدي زي مفتاح الحبة… عجيب .. حتى بقيت أسعى المفاتيح اختها في عربتي الداتسوان.. مرة احتاجوا لمفتاح في الصيانة وجدهو عندي… والله لامن اتكيفت كنت معتبر كأني حليت مشكلة فلسطين…المهم مهاراتي الزمن داك.. بفضل تقنيات التنمية البشرية ومعرفة الأنماط اكتسبت الكتير… يوم جاي البيت الصباح طبعاً متعود ازورهم الصباح يومياً الله يرحمهم ويحسن إليهم وينزل شائبيب رحمته على قبرهـما ويغفر ويرحم موتانا وموت المسلمين … لقيت ليك ابوي دا قاعد متحير عندو ماسورة الحمام ضربت من بالليل… وما قادر يحل المشكلة رغم حرفنته الشديدة والوقت بدري ولسع السباكين… يا زول هجمت ليك على الماسورة وقدرت أوقف الدفاق المهم اتصرفت فيما اذكر ببراعة… طبعاً ابوي دا لامن احتار معقول دا سامي السر… طبعاً كتير من الأسرة بتناديني بأسمي كامل… ما فضل الا يعمل حركة الأب صاحب النكتة… أمي طبعاً اتكيفت كيف شديد.. وشغل المكاواة ماشاء الله ابوك الليل كلو مهموم… دفقت موية كتيرة خلاص الله يبارك فيك يا ولدي … وطبعاََ قلعت هدومي كان اتبلت وجابت حاجة زينب المشروبات الساخنة… أما قصة باعام حسب مصطلح مازن سامي كنت بسوقوا معاي اي دورة التدريبية وبشغلوا ليك معاي تماماً وبدرشو البروجكتر… التوصيلات توزيع الأوراق كل نشاط مساعد… بعد ما كبر قال لي انا كنت بقول لاصحابي ابوي مشغلني باعام… قلت ليهو باعام دا شنو يا ولد… قال لي الباعام هو ولد العازف الابوه بشغلوا معاهو في الحفلات يدق البنقز…
واملحوا ساكت تعريفة ما يديها ليهو

سبحان الله اليوم بقرأ في كتاب
للرائع الطبيب النفسي الأمريكي
بتكلم عن العقل والمخ
وهو يفرق بينهم من خلال أبحاثه المحكمة
والتشريحية والتصوير الإشعاعي المتقدم.
بروفسر دانيال سيقال
الأن بقرأ
مشغل ولدهـ باعام (16 سنة)
سايقوا معاهو المحاضرات هكذا ذكر في كتابه
الأبصار (البصيرة)
مساكين اولاد
البروفات
والدكاترة
والمدربين
والعازفين

دائماً شغالين مجاناً (مملوحين)

مودتي
ابو زينب
متخصص في السلوك التنظيمى بالمنشأة الصناعية
جامعة الملك خالد
الكلية التطبيقية
اعلامي تنمية بشرية وبناء قدرات