الابطال المنسيين (25)
*عمنا الملازم ختم توماس*
عمنا الملازم ختم (توماس كما نحب)
الشخصيه دي حيرتني صراحة
اول ماشفتو قلت للرائد وليد العجب عمك دا حايشتغل شنو الا غايتو كان شغل اداري معاك
بعد بدينا شغل لقيته دينمو القوة زول عندو ثبات وطاقه في الشباب ماف
رفض اي شغل اداري
شايل بندقيته وخزنه واسد في الميدان
ماتخلف عن مامورية الا ايام الاصابه
مواقفي معاهو كتييره واسمه جا كتيييير في ذاكرة المعارك
اول يوم ندق اللستك ٢٠٢٣ الوقت داك اللستك دا نص العدو والعدو منتشر وساكن بكل الاتجاهات فبعد وصلنا محيط سوق السامراب من الاتجاه الحنوبي بديت توزيع قوة الهجوم على السوق (سوق السامراب) وعلي اللستك
اها كلفته بمهمه الوصول للستك من اتجاه ١٣ الدروشاب معاهو قوة بسيطه حوالي ٥ افراد يفترض يقطعوا الشارع ويامنوا الموقع منعا لالتفاف العدو ونحن من السوق نتقدم للارتكاز اول ماخشينا سوق السامراب ودا السوق الرئيسي بشمال بحري الزمن داك وملان دعامة سمعت ليك ذخيرة جد اتجاه اللستك جريت عليهم لقيتهم جغموا ارتكاز بي عربيته المقاتله وافراد كمية وشتتو الباقين وهو في نص الشارع لحدي ما اتصاب.
في الدروشاب يوم جرينا على اتجاه العدو المتمركز في خور وفاصلنا تلاته شوارع انا اخترت طواف حسين معاي وهو واقف جنبي قلت لي استلم الجهاز بتاع الاتصال دا مامعروف يحصل شنو ولو حصل شي اسحبوا القوة ماتشتغلوا بينا قال لي انا ماشي معاك مابقعد وفعلا شهادة لله والتاريخ رغم فارق العمر جاري قدامنا ومشتبك وجاري..
الدعامه ديل كان لمن يزنقونا اكتر زول بثبت القوة دي هو بقيف فوق يشتم القوة والدعامه سوى ويمشي علي الذخيرة تلقى القوة دي تكورك وتضحك ووراهو
اي مامورية كان الاعتماد الاساسي عليه في قطع طريق الالتفاف والفزع وتامين ضهر القوة ماحصل يوم واحد جيت لقيته غير موقعة ولا خش الضل ساي محل قاعد دا بقعد ساعات سخانه برد مطر اكل جوع عطش هو ثابت وقاعد بنفس قوته وحماسه وثباته وطاقته
من الشخصيات المابتسمع ليها صوت الا وقت الذخيرة زول هادي ويتعامل معاك بتهذيب يخجلك
بمثله انتصرنا وبمثله نفخر
عمنا توماس متعك الله بالصحه والعافيه وعظم الله اجرك وتقبل منك ونحن فخورين بيك كسودانيين قبل كشرطه
كن بخير ياسعااااااادتك
#الكتراااااابة
