د. محمد صالح الشيخابي…
*أليس في بلاد الزاريب ( ١ ) ..*
من هسة نتفق :
لو انت من نوع لو ما جيتا من زي ديلا واااا أسفاي .. ونحن أعظم شعب .. لو انت من النوع دا ابقى مارق المقال دا ما بخصك ..!!
معناها انت من النوع البغش في نفسو . .
و سلسلة المقالات دي .. اي مقال شعارو :
*(( حقائق مؤلمة أفضل من أوهام مريحة ))*
يلا … نبدأ..
عجايب لا تحصل إلا في هذا البلد الأشبه بالزريبة :
. البلد الوحيد في العالم الذي فيه عقوبة التمرد هو المناصب السيادية!!!
. و عقوبة إعلان الحرب على الدولة و التسبب في قتل الناس هو دخولك مجلس الوزراء وزيرا ً إتحاديا ً. ..
. البلد الوحيد الذي يدخل فيه الإنسان كلية الطب بمجرد الرغبة.. !!!
. و في الحقيقة هو البلد الوحيد الذي تحدد فيه نسبتان لدخول الطب..!نحن فعليا ً نقول : نسبة الدخول لكلية الطب مثلا ً 93 للما عندو قروش و 90 للعندو قروش !!!
. و البلد الوحيد الذي يبدأ الطالب بدراسة المختبرات او البيطرة و في السنة الثانية عادي كدا يتحول طب بشري ..
. المافي شنو ؟ فرق الطب من البيطرة شنو عشان الإنسان حيوان ناطق يعني ؟؟
. الشعب السوداني هو الشعب الوحيد في العالم الذي يتناول إفطاره أثناء ساعات العمل ..
. الإفطار في كل العالم الساعة السادسة صباحا لأن هذا هو الإفطار الصحي بشيء مالح و ليس لبن و نشويات .. !
. السوداني هو الشخص الوحيد في العالم الذي يفتخر بتميز رقم جواله لأنه غالبا ما عندو شي تاني يفخر بيهو ؟
شنو يعني رقمك مميز ؟ إسعاف انت و لا عربية مطافي؟؟
. كل القبائل في السودان ينتهي نسبهم للعباس عم الرسول صلى الله عليه وسلم..
و حتى لو صدقناك انك من نسل الرسول .. دي برضو ما ميزة لأنو الحساب يوم القيامة بي الأعمال ما بي الأنساب و الرسول صلى الله عليه وسلم في اتنين من اعمامو ماتوا على غير الإسلام و ما بقدر يشفع ليهم يوم القيامة…
و …
*نكتة* :
نكتة حقيقة طبعا من الواقع الأليم المضحك المبكي :
لاعب كرة قدم تم تتويجه بلقب هداف الدوري السوداني الممتاز في أحد الأعوام و احتفل مع جماهير فريقه عصرا ً ..بعد المغرب جوهو ناس إتحاد الكورة قالوا و الله يا ولدنا كان بي ودنا نتوجك بلقب هداف الدوري لكن كان في مباراة أخرى في بورسودان و ما كنا متوقعين يكون في لاعب محترف غاني شليق يجيب خمسة أهداف في مباراة واحدة .. فشنوووو يا ولدنا .. المحترف الغاني دا هو هداف الدوري رجع لينا الكأس الأديناك ليهو بي العصر عشان نديهو ليهو و انت نتمنى ليك التوفيق في السنوات الجاية..
الغريب في الأمر أن بورسودان تسبق الخرطوم في التوقيت و مباراة بورسودان انتهت قبل مبارة الخرطوم بأكثر من ساعة لكن ناس اتحاد الكورة ما كلفوا نفسهم تلفون عاوزين يخلصوا بدري و ينوموا…
. زي الموظف السوداني عاوز يخلص شغلو كيفما اتفق و يشيل كيس خدارو و يبقى مارق ..
*تعريف*
تعريف الموظف السوداني :
الموظفين بارعين في تظبيط الفطور و النوم في مسجد المصلحة أو المؤسسة و الموظفات بارعات في عمل الصناديق و البيع بالاقساط..
*دراسة*:
متوسط ساعات عمل الموظف السوداني التي ينجز فيها عملا حقيقيا هي عشر دقائق فقط في اليوم ..
*نكات من ذكرياتي من أيام الكورونا* :
. الواحد يدردم سفتو يقول ليك الكرونا ما بتجي البلد دي و كان جات في السخانة دي بيطير ليها !!
الكرونا الضربت كل دول العالم بدون استثناء للبلدان الباردة كإيطاليا و الصين و امريكا و الحارة كالسعودية و الجزائر و المدارية و الاستوائية كالبرازيل تجيك انت كيف يا شعب الله المختار .. !!!
. و نفس الزول دا بعد الكرونا تخش بيتو جوووة يجي يملأ الفيسبوك منشورات عاوز سرير عناية مكثفة و اسطوانة اوكسحين لمريض كرونا في امدرمان .. !!
أقسم بالله نكتة حقيقية حصلت لي شخصيا ً في المواصلات واحد قال لي مالك لابس كمامة ؟
قلت ليهو وقاية من الكرونا .. قال لي طيب لو أصلا عندك كرونا في بدايتها و انت ما عارف..؟ . قلت لنفسي ما شاء الله دا زول فاهم بتكلم عن فترة حضانة المرض.. قلت ليهو يبقى برضو بلبس كمامة عشان ما أعادي الناس .. قال لي لكن الكرونا الجوة صدرك دي بتجي طالعة مع أنفَاسك و بتدق في الكمامة و ترجع ليك تاني و انت كدا بتتاذي أكتر
. بنتين جمب مول الواحة أثناء الكورونا واحدة لابسة كمامة و التانية ما لابسة بتاع الأمن قال ليهم ممنوع الدخول بدون كمامة قدر ما حنسوهو رفض .. في النهاية البت اللابسة كمامة قالت لي صاحبتها و لا يهمك حبيبتي انا بخش بقضي اغراضي و بجي طالعة سريع اديك الكمامة تخشي .. و هذا ما حدث .. و تحت سمع و بصر رجل الأمن..دخلت و اخدت زمنها و جات قلعت الكمامة لي صاحبتها دخلت بيها
و فنانة قونة شغالة حفلات في مدني عادي بتتحدى السلطات و بتتحدى الكرونا زاتها لا و كمان عاملة أغنية مطلعها ( جيبوا لي بخور عدني.. الكرونا جاتنا في مدني ))
و حفلات محمد النصري شغالة كتبت عنو في الفيسبوك رد علي واحد من أنصار النصري قال لي الكرونا دي في حفلات النصري بس ..؟؟
ليه ما كتبتوا عن حسين الصادق و محمد الأمين ؟؟ وباقي الفنانين ما عملوا حفلات ليه ما اتكلمتو..
و وزير التربية و التعليم في بلاد الزرايب بدل ما يعلن إغلاق المدارس قال نشتغل سبت و اتنين و أربعاء.. باعتبار انو عمل اتفاقية مع الكورونا انها تجي احد و تلات و خميس …
و ..
نحن بنقنص صقر الجو المحلق رجججج ..
نسر و صقر الجو خلوهو .. كدي النقنص الجراد و الزرزور و الآفات الزراعية المكملة محاصيلنا كل سنة بسبب تناحة و لطاخة المزارع من جهة و فساد المسؤولين من الجهة الأخرى …
و …
نحن بلا فخر جلد النمل سالخنو … كدي لو فرضا ً صدقنا المقولة الهبلة دي أنو ممكن إنسان يسلخ جلد النملة .. الفايدة شنو ؟؟
النمل سالخين جلدو ليه خلوهو دي حشرات مكافحة يا ريت نصل مرحلة النمل في العمل و الكفاح ..
النمل خلوهو دي حشرة مسالمة أقصى ضرر تعملو قرصة صغيرة لو ضغطت عليها و عطلتها من شغلها.. الأفضل نتهابل و نتكلم عن سلخ جلد النمل و لا الأفضل و الأولى مكافحة البعوض و الذباب اللي من الاستقلال غالبانا و سنويا الناس تموت بالملاريا و الكوليرا و حمى الضنك..
و ..
*قبل الختام*:
وزير صحة – متمرد – قال وزارة الصحة دي زاااتي انا ما كنت عاوزها لكن جبروني عليها : ..خلاص يا بروف زويل
المرة الجاية نشوف ليك وزارة تليق بكفاءاتك .. و كفاويك…
*خاتمة*:
في بلاد الزرايب… حيث القانون في إجازة و حيث يعيش المنطق تحت الإقامة الجبرية
في هذا البلد، كل شيء يمضي ضد الفطرة. النجاح عبء، والجهل وسيلة، والتبرير فن.
كل يوم يمر، يُضاف إلى أرشيف طويل من المشاهد التي لا تحتاج لكاتب كوميدي، بل لمؤرخ جنائي يوثّق كيف نجحنا في جعل الفوضى نظاماً، والعبث منهجاً، والفشل سياسة.
هل ما زال هناك أمل؟ ربما.
لكن البداية لن تكون بتغيير الحكومة فقط، بل بتغيير عقولنا التي سمحت لهذا الواقع أن يبدو طبيعيًا.
نواصل إن شاءالله في سلسلة أليس في بلاد الزاريب…
*د. محمد صالح الشيخابي..*
*مايو 2025*
