مشاهد من الحوش السوداني [ ٢ ] ؛
د. محمد صالح الشيخابي
*شاي .. عصر ..*
*هو* – ككل رجل – يريد أن ينهي الأمور و يحسمها و يفاتح والدها في الأمر و يطلب يدها منه رسميا ً ..
و *هي* .. مثل كل أنثى .. تريد أن تتدلل عليه و تختبره لتعلم مقدار حبه .. و طعم حبه .. و لون حبه ..
قالت له ذات يوم ..
– بتحبني قدر شنو ..؟
– قال إيييييك .. و لا بتحسب ..
– طيب حبك شكلو كيف ؟
– إييييك و لا بتوصف ..
– طيب زي شنو ؟
– الغيمة .. ⛅
– و تاني..
– الدَرَت..
– و تاني ..
– الدعاش ..
– و تاني ..
– حوض الخدرة وكت يفرهد..☘️
– و تاني ..
– خلاص ..
– لا عليك الله زيدني.
– أبيت. ..
– عشان خاطري..
– حتقولي علي مجنون.
– اموت في جنك ..قول..
– جني عيونك ديل ..
– لسة ما قلت .
– ما قادر اوصف .
– قول بس زي ما تجي..
– شوفتي لمن اكون راقد في البيت ..
– اها..
– بي العصرية ..
– اها
– و نمت نومة الظهر ديك ..
– وبعدين ..
– صحيت العصر اتغديت
– اها
– و شربت شاي العصر .
– ايوة ..قول ..
– و رقدت في ضل العصر داك
– حلووو…
– و في صوت عصافير جاي من النيمة .
– الللاااااه ..
– و صوت شفع بلعبو برة و بضحكوا بي فرح طفولي ..
– آآآخ ….
– في الساعة ديك أسمع صوت زي نغمة الأورغن..طق ..طق ..
– جاي من وين ..
– من نقاع الزير وكت يكب في القًلة المكسورة تحتو
– أها ..
– …بس .. أنتي ياكي اللحظة دي زاااااتها
– محممممممد ..
– قولي ..
– حا تجي تخطبني من أبوي متين .. ؟؟
❤️❤️❤️☕☕
