يحدونا شوق
لكن في شوك
بعدين سوا
ما زي براهو بجي الهيام
بتصدقي؟!..
لو قلت ليك يا واقعة من طرفة هطول الغيمة بين همس العيون الناعسة
بتصدقي انا كنت جاي عليك شايلني الحنين
وكمنجة شايلة في الكتف
كسرن عليَّ
نمات رحيق صحبتنا ديك
الكان خطوبتها لي عصام صاحب العطارة البابها فاتح في الظلط
واتفرتق الغنا
للبكان
وبكيت معاك
قبال اجيكي بكيت معاك
علي البنية الكان خطوبتها لي عصام..
وبكيت عصام صاحب العطارة بكيت عطارتو مع الزلط
حتى الزلط بكانا زين..
ما اصلو خماهم بلا
سايق معاهو الجنجويد
وانا شفتها
قبال تروح في رؤية مارقة على التلال ..
اولاد عطية وراها شايلين الزفاف
وبي وشهم
قسموا العرس
ناس للصفاح ناس للرهط
وشفت العروسة مقسمة
ما بينا كانت دون زفاف
صوت الكفاح
جواها عامل جلجلة
ومتذكراك ومزهرة..
وبعدين معاك أنا يا (شفق)..
يا زولة ماثلة
واحتياج
مالكني شوق
قاعد وشايف ومستحي
من زولة راحت
في الحرب.
*ابو الشوش*
*برام* 18/11/23
