*من كل النواحي* كلمات وشعر : *د/ محمد صالح الشيخابي..* *لروح الشهيد محمد صديق*

*من كل النواحي*

كلمات وشعر :

*د/ محمد صالح الشيخابي..*

*لروح الشهيد محمد صديق*

من كل النواحي ..
و من أي اتجاه
فارس و قلبو صاحي..
تفخر بيك بلادك ..
مرفوعي الجباه
طال ما فينا زيك..

في كل النواحي ..

تفتخر المدن ..

و القرى و الضواحي..

*(( يمثلنا تماما))..*
من كل النواحي..

حالف اجيبو تارك ..

لو تنزف جراحي ..

بالليل و النهار ..

و أواصل كفاحي ..

……..
للجندية عاشق ..

و الصفا .. إنتباه..

مارشات العساكر

طابورا الصباحي

للأوغاد تقول

الإيمان سلاحي

لو جاتني المنايا

من كل النواحي
….

جيت من ياتو ناحية

يا هذا النبيل ؟؟

من ترب النجومي..

أم .. عبد الفضيل ..؟؟

شايل التاكا هامة

و لابس العزة نيل

قناتك ما بتلين

يا اب طبعا أصيل..

جيت من ياتو ناحية…

يا اب .. أصلا .. أصيل..

عريس حور الجنان..

بالزين و العديل..

في جنة عدن ..

و الظل الظليل..

في جوف الطيور ..

روحك في مقيل ..

و تطوف بالثمار ..

في كل النواحي ..

في المسا و المغارب..

و الضحى و الأصيل..

سائح في الجنان ..

و انت شهيد سياحي..

و القرآن دليل ..
……… ……

أرض الصالحين..

و النيل و النخيل.

من دمك روت.

يوم جرى سلسبيل..

ايقظت القلوب ..
النامت قبيل..

صرت القدوة فينا
و الهادي الدليل ..

قول للجنجويدي ..
و الزول العميل ..

جاياكا القيامة ..
و .. الناس القبيل ..

احتليت ديارهم ..
ما فيهم ذليل ..

من كل الدروب ..
قاصدنك عديييل ..

إستنفار .. و كاكي ..

شان يشفوا الغليل..

من خلوة فداسي
و الطينة الجبيل .

من السني مدني ..
و امبدة السبيل ..

حراب ترهاقا جاية
في قلب العميل ..
……

جيت من ياتو ناحية ..
يا هذا النبيل . ؟

من نور الخلاوي..
و المد الطويل ..

من نار الضيوف ..
واقدة صباح و ليل ..

من مدح اب شريعة ..
للحجاج دليل ..

من فن الحقيبة

و اشعار الخليل..؟

يا مليون جلالة

في الزمن الجميل

تارك تب نجيبو

بالبل التقيل …
.. …… ……….. د. محمد صالح الشيخابي.. لروح شهيد الشعب السوداني : الشهيد/ محمد صديق ..