من أكبر المشكلات الموجودة في الشعب السوداني (العظيم! / المعلم! / المختار!) واللي الحرب دي طلعتها بصورة واضحة = مشكلة (وهم الاستحقاق) ..
شايفين روحنا أفضل من يمشي على الأرض ونستحق كل جميل لا لشيء سوى أننا منتمين لرقعة جغرافية حدودها اعتباطية قابلة للتغير مع أي وهم سياسي جديد اُصطلح عليها باسم ( السودان )!..
مع أنه الحقيقة المشاهدة إننا شعب عادي جدا زينا زي أي شعب تاني بل فينا صفات كسل وخمول وعشوائية زايدة ..
اتعود التاجر السوداني على الأرباح المضاعفة في السودان اللي لا فيه منافسة لا فيه رقابة لا فيه أي شي .. سوق مفتوح تماما
مشى بنفس عقليته دي في دول الجوار وتلقاهو شااااطح بعيد في الأرباح ( أقل شي هامش ربحه بيكون الضعف )…
والمشكلة بنقدم أسوأ خدمة بأعلى سعر يعني لا في العير ولا في النفير ..
وكل المنافسين من بقية الشعوب يا إما بقدموا جودة عالية جدا أو بقدموا سعر منخفض جدا ومرات كتيرة بقدموا جودة عالية وسعر منخفض، عشان ينافسوا والحياة تمشي..
إلا السوداني من بين كل الناس عايش وهم استحقاق في حين إنه هو بقدم خدمة أو منتج عادي أقل من العادي وفيه خيارات بديلة ليهو كتيرة..
ياخ في مطاعم سودانية بتعمل حاجة اسمها رسوم خدمة ١٠٪ يعني أي شي ببيعوه بختوا ليك فيه ١٠٪ من قيمته زيادة اشتريت بـ١٠٠٠ج تدفع ١٠٠ج زيادة رسوم خدمة! .. أنا شخصيا ما حصل لقيت حاجة بالمبلغ الكبير ده ولا في المطاعم الكبيرة للدول التانية ! شفشفة سودانية خالصة .. دي ضريبة عديل يا أخوي ما رسوم خدمة
وكمان بنتعامل مع البزنس بعقلية الشكلة: ما عاجبك ما تشتريه
ياخ أنت في عملية تسويقية ما بتتكلم باللغة دي وتطفش الزبائن منك!
عشان كده الغلاء الكان في السودان جزء من أسبابه نحن ذاتو .. عشان كده لو انتقلنا لأي بلد الغلاء حيلاحقنا لأننا بنصنعه صناعة في عقولنا وفكرنا ..
شوف كمية المهن غير المنتجة زي السمسرة والتحويلات وتجارة العملة منتشرة كيف فينا لأننا بنحب الركلسة والميتات .
يا عزيزي السوداني..
كلمة سوداني دي ما فيها أي ميزة جديدة عليك عشان ما تتوهم ساي ، ده لو ما بقت مسبة ومنقصة؛ في بعض المجالات والدول بقوا يكتبوا في الشروط الوظيفية ( ألا يكون سودانيا ) بسبب سوابق الكسل والعشوائية المعروفة فينا ..
……
#منصة_اشواق_السودان
