ياسر بشير يغرد :
وانت ماشي في السوق…
وانت ماشي في السوق اليومين دي بتلقى أطفال أو شباب لافين او فارشين مخبوزات ( بسكويت ،، بلح شام ،، بسبوسة ،، كيك ) او بهارات او فارشين أي حاجة .
إذا عاينت للحاجات دي حاتعرف انه وراها أم أو أخت قامت بتجهيزها ويتكفل الطفل أو الشاب ببيعها في السوق في محاولة منهم لسد حوجتهم وليس زيادة رأس مال أو توفير أموال ،،
انت طلّع من جيبك قروش حتى لو مفلس ، وأجبر بخاطر الطفل أو الشاب ده ، واديهُ بالأكتر٢٠٠ جنية اشتري بيها منو حاجة ، القروش البتدفعها دي بالنسبة ليك ولا حاجة لكن بالنسبة ليهم تعويض لتعبهم وفرحة للأسرة القاعدة في البيت ومنتظرة دخول الطفل بجملة ( الليلة بعت الصينية كلها ياأمي ) ،،
وصدقني حاتشوف تعويضات كبيرة جداً من ربنا❤️
في الدنيا دي كلها مافي أحلى من جبر الخواطر♥♥♥
نصر من الله وفتح قريب
