*وقل اعملوا*
*د عبدالله جماع*
*لماذا يؤذن العطا في مالطا؟*
مالطا هي جزيرة صغيرة في البحر المتوسط، وكانت تحت حكم فرسان القديس يوحنا( الصليبيين) من 1530 وحتي 1798 وهي دولة كاثولوكية متعصبة، ما فيها مسلمين نهائي ولا يوجد بها مساجد. فحينما يقولوا ( بيأذن في مالطا) قاصدين ( زول بتكلم ساي). ينصح، يوعظ، يهدد..الخ. بس مافي شخص سامع كلامه ، ولا فاهم عليهو. زي الامام الواقف بأذن في جزيرة كلها قساوسة( صوتو برجع ليهو براهو). يعني بنفخ في قربة مقدودة، او بكلم حيطة.فحكومتنا هداها الله، كل يوم تطلع قرار جديد. استيراد وقود، حظر سلع استهلاكية كماليات، تصدير دهب، وقف التضارب في بيع الدولار..الخ. فكأنها بتأذن في مالطا. ووين المواطن؟ فالاذان يرجع للمؤذن زاتو!! مع العلم ان المواطن يصبر ويتحمل لظروف البلد الاستثنائية. لكن لماذا يؤذن سعادة الفريق ياسر العطا في ( مالطا مقر الحكومة حيث مكتبه ومقر عمله). وفي نفس الوقت يشتكي من فشل الحكومة في عدم مقدرتها في كنس الجنجويد المنتشرين في الوظائف الحكومية العليا والممسكين بمفاصل الدولة وكاتمين انفاسها من بنك السودان المركزي ومكاتب النائب والثروة الحيوانية والاعلام ، وماخفي اعظم ولا ادري هل قيادة الجيش سقط ذكرها سهوا من تصريحات سعادة الفريق العطا ام فعلا هي مبرأة من كل اثم ( وما فيها شق ولا طق). وسعادة الفريق ياسر العطا حفظه الله ورعاه. عودنا في كل مرة يطل علينا فيها بالشكوي من استيلاء الجنجويد قاتلهم الله علي كافة مفاصل الدولة، وظل يردد علينا ويشير لنا عن بعض اماكن تواجدهم بهياكل الدولة المختلفة.طيب يا سعادة الفريق العطا انت بالظبط كده الحكومة ام المعارضة؟ وانت بتشتكي للشعب من فشل الحكومة. اذن لمن يرجع الفشل ياسعادتك؟ لاسيما وانت عضو مجلس السيادة والمسؤول التاني في الدولة!! يعني بتشتكي لنفسك وانت ماسامع ام ماذا؟ والشعب يعاني.. ومع انقطاع الكهربا وارتفاع الدولار وتنمر شركات الوقود علينا وكل ماهو بنا الا اننا سعداء لاننا بديارنا وداخل وطننا العظيم وفي انتظار نهاية كنس الجنجويد وانتصار حرب الكرامة.وعليه يا سعادة الفريق العطا الموضوع لايحتاج الي خطب عن الفشل وانما من هو المسؤول عن الفشل وماهو الحل..فانت ياسعادة الفريق العطا يا اخوي انت لست مواطن ساي او عادي عشان تشتكي معانا للمسؤول فانت المسؤل وبيدك القلم الاخضر والاسود. فليش بتأذن في مالطا؟. مع انها جرأة وشجاعة منك تحمد عليها. ( لكين كمان مش بدرجة الاذان في مالطا). فكانك حينما تشتكي لنا نحن الغلابة، مثل الزول الكسر الشباك وقاعد يلوم الهواء الدخل منو.فنحن الان ننتظر عشان تورينا الحل عند منو؟. وفي النهاية ياسعادة الفريق ياسر العطا ، اهلنا قالوا مثل عجيب( الله يجيرك من البتشتكي ليهو وهو بشتكي ليك)!!
0912164905
Jamma1900@hotmail.com
