*الدعاء و القنوت شغال و الجنجويد متقدمين .. !!!!*
من الآخر كدا و بدون مقدمات :
– *أئمة المساجد داخل السودان و في بعض الدولة العربية شغالين قنوت و دعاء و نحن وراهم نقول آمين لينا قريب سنة … و الجنجويد كل يوم ماشين متقدمين !!!* ما سألنا نفسنا يوم السبب شنو ؟؟
*بعد وفاة د.جون قرنق عام 2005 نائب رئيس الجمهورية وقتها هدد باقان اموم القيادي في الحركة الشعبية من أن الدولة إذا لم تتدخل لمنع انفلات الأمن فإن السودان سيتحول إلى رواندا أخري …!! .. هدد السودان بمصير رواندا ..!!!*
– *اليوم و بعد خمسة عشر عاما فلنسأل أنفسنا أين رواندا الآن و أين السودان ؟؟*
ناس رواندا بعد الحرب الأهلية عملوا شنو ؟؟ … اي واحد إعترف بجرائم الحرب الإرتكبها في التلفزيون .. قلنا وين .. في التلفزيوووووون … و واحدين لمن وصلوا لي حتة معينة و هم بيحكوا جرائمهم قعدوا يبكوا.. !!!!
و منها حصلت المصالحات الوطنية و المصالحات القبلية بل و المصالحات الشخصية و أعقبها رئيس رواندا بإصدار العفو العام ..
لكن عفو عام بعد الاعتراف بالجرائم في التلفزيوووووون والإعتذار .. ثم بعد ذلك بدأت نهضة رواندا التي لم تتوقف حتى اليوم …💪💪و أصبحت تملك أعلى معدل تنمية في العالم و أفضل إقتصاد في أفريقيا و من اكثر بلدان العالم أمنا و أمانا و نظافة و احتراما للقانون و جذبا لرأس المال و الإستثمار ..
هسة يا أهلنا ما ضروري نعترف بذنوبنا في التلفزيون …
التلفزيون خلوه ..
في المصلاية بس .. !!
كلنا نعترف بالخيانات العملناها في أداء عملنا أثناء السلم مما سبب الحرب و طوالي نتبع القول بالعمل ..
*رد الحقوق لأهليها على عجل ..حتى و لو أنها كانت مساويكا..*
رحم الله الشيخ الشاعر الفيلسوف عبد الرحيم البرعي..
و صلح نيتك و عملك و قولك و اتصدق .. و اعمل صدقة من جزء من عملك .. مثلا الطبيب غير عيادتو يعمل يوم مجاني في مستشفى حكومي أو مركز صحي… أو مركز بتعامل بالتأمين الصحي لعلاج الغلابة و المعاشيين و المتعففين ..
فلنواجه أنفسنا بحقيقة المرض لنبدأ العلاج العاجل ..
– *حقائق مؤلمة و لا أوهام مريحة..*
– *جربنا كل الحلول مع الجنجويد إلا هذه الطريقة ..*
– *الحل في بل الخدود بدموع التوبة لله و ليس ببل السلاح ..*
نحن السودانيين جربنا الترحيل الجماعي و الزواج الجماعي و الكذب الجماعي و النفاق الجماعي و الغش الجماعي و العنصرية الجماعية و الغيبة و النميمة الجماعية و الفساد الجماعي و الربا الجماعي و أكل مال السحت الجماعي و الهبالة و العباطة الجماعية و الحقد الجماعي و النفاق الاجتماعي …!!!
*لكن ما جربنا التوبة الجماعية ..!!*
نتوب شنو ؟؟!!🫤
شايفكم بتسألوا بكل براءة نتوب من شنو ؟؟😏
ياخي لا صدقتكم..
ما نعمل رايحين ..
الشي البعملوه الجنجويد دا ما حصل عملوه بشر في التاريخ إلا:
١/ المغول و التتار و ٢/ ح يعملوه يأجوج ومأجوج قبل القيامة بشوية كدا …
معناها الحاصل دا غضب إلهي …
و امن أسباب عدم استجابة الدعاء أكل المال الحرام .
..*في الحديث النبوي ما معناه : إن الرجل ليرفع يديه بادعاء و مأكله حرام و مشربه حرام و ملبسه حرام و غذي بالحرام.. فأنى يستجاب له .. !!!*
تقريبا كل الشعب دا بياكل مال حرام … و الما بياكل حرام يصيبه غبار منه ..و هناك أيضا حديث نبوي بهذا المعني ..
لسة بتسألوا نحن عملنا شنو ؟؟
أوريكم ما دام عاملين رايحين ..
و ما أبرئ نفسي..
و ابدأ لكم بأهلي قبيلة الحقل الطبي :
– الدكتور يجيهو مريض في غير تخصصو بدل يرجع التذكرة و يوجهو.. يجغم القروش و يعمل رايح ..صاح انت طبيب ممكن تعالج لكن انت عااااارف إنو صاحب التخصص حيعالجوا أفضل .. فساد و أكل مال حرام و لا لأ ؟؟
– بتاع المعمل يجيهو المريض يقولي عاوز افحص ملاريا و تايفود و جرثومة معدة ..بدل يقول ليهو قابل الطبيب اول يفحص ليهو الدايرو و يجغم القروش .. فساد و أكل مال حرام و لا لأ ؟؟
– الصيدلي نفس الشي يجيهو المريض يشتكي ليهو و يقول عاوز دوا ملاريا و كبسولات النزلة و الصيدلي عارف انو النزلة دي فيروس و الكبسولات مضاد بكتريا مع كدا بدل يقول ليهو قابل الطبيب يقوم يبيع ليهو العاوزو و يجغم القروش.. فساد و أكل مال حرام و لا لأ ؟؟..
سواق المواصلات البضاعف سعر التذكرة تلاتة مرات و و يقسم الخط ٣ أجزاء .. فساد و أكل مال حرام و لا لأ ؟؟…
زيادة الأسعار و الجشع وتخزين السلع فساد و أكل مال حرام و لا لأ ؟؟
الرشاوي للموظفين و النظاميين و ناس المرور فساد و أكل مال حرام و لا لأ ..
بيوت الدعارة و بيوت الخمور والمخدرات فساد و أكل مال حرام و لا لأ ؟؟
– السماسرة و السبابة البزيدو الأسعار و يختوا فوقها طاقية و ربح مالي خيالي فساد و أكل مال حرام و لا لأ ؟؟
– بتاع المحلية البخلي ليك تسجيل المخالفة مقابل رشوة فساد و أكل مال حرام و لا لأ ؟؟
الجامعات الخاصة البتقري الطلبة بالقروش بغض النظر عن نسبة تحصيلهم فساد و أكل مال حرام و لا لأ …
الموظف البشتغل ساعتين في اليوم و يقضيها حوامة و نوم و آخر الشهر يصرف مرتبو كامل فساد و أكل مال حرام و لا لأ ؟؟
– حفلات القونات المتبرجات و كلها بنات لابسات ضيق و الأولاد اللابسين بناطلين ناصلة و الأولاد المايعين فساد و لا لأ ؟؟..
رحلات شارع النيل و الساحة و بنات الليل و خطف البنات بالعربات فساد و لا لأ ؟؟…في بوست انكتب بعد شهر من الحرب قال مدني ح تسقط لأنو القونات بتوع الخرطوم انتقلوا ليها بكل مجتمعهم و عاداتهم و حفلاتهم الماجنة و قد كان ..
بتاع اللبن البزيدو موية و بتاع الطعمية و الزلابية و البيرقر و بتاع المطعم البغلي الزيت ستة مرات فساد و لا لأ ؟..
بتاع الفرن البشيل حصة المواطن و يبيعها لي ناس الخبايز و الحلواني فساد و لا لأ ؟؟
بتاع الطعمية البخلط الكبكبي بالعيش فساد و لا لا ؟؟
خريجة زراعة قرت كورس صيدلة ٣ شهور و شغالة في صيدلية فساد و لا لأ ؟؟
اي واحد طلع كورس أونلاين ٣ يوم يفتح معهد و يسمي نفسو مدرب تنمية بشرية يلقط قروش الناس … فساد و لا لأ
..
ياخ انا تاعب نفسي ليه .. اي واحد فينا كوووولنا يتوضأ و يقعد في المصلاية و يعترف بذنوبو بينو و بين ربنا …
