ناصر بابكر يكتب: *أزمة البث.. بالدارجي وبس*

ببساطة شديدة يا جماعة وبالدارجي..
السلعة البمتلكه اتحاد الكرة وبملك حق بيعها هي شنو؟ هي مباراة الكورة بين المريخ والهلال..

السلعة الاشترته تاسيتي هي شنو؟
هي مباراة الكورة بين المريخ والهلال..

اشترت السلعة عشان تبيعها لي منو؟
لي جمهور المريخ والهلال..

يعني قيمة السلعة (مباراة الكورة) البملكه الإتحاد البتخلي قنوات تشتريها منه شنو؟

قيمته هي جمهور المريخ والهلال..

طيب..

انت كاتحاد كورة بتستثمر في جمهور المريخ والهلال مش الطبيعي أنه يكون الناديين عندهم حق نصيب في عائد تسويق السلعة دي زي ما بحصل في كل العالم حتى في السودان وده منصوص عليهو في اللوائح..

طيب..

ليه الهلال ما اعترض؟
ببساطة شديدة لأنه مستفيد من أنه عنده إتفاق مع تاسيتي على تشغيل منصة الهلال والبث عبرها باشتراك مدفوع وبالتالي ح يحقق عوائد وح يستفيد من البث عبر تاسيتي ومنصة الهلال..

طيب..

لو الهلال ما كان مستفيد وما كان عنده إتفاق مع تاسيتي كان ممكن يقبل يلعب الكورة دي بدون ما يستلم نصيبه من عائد البث اللي حصل عليه الإتحاد من تاسيتي؟
أكيد طبعا ما كان ح يقبل يلعب لأنه مافي نادي ممكن يقبل افرط في أبسط حقوقه واقبل أنه حقه يتنهب عينك عينك..

يعني المريخ غلطان في موقفه؟
طبعا لأ، موقفه صحيح وسليم مية المية

هل المريخ عنده حق يعترض على وجود كاميرات في الملعب؟
طبعا عنده مليون حق، ببساطة كلام بيع الإتحاد حق البث لتاسيتي ده كلام في الإعلام والوسائط والمريخ الطرف الأصيل في المباراة ما عندو أي اخطار رسمي من الإتحاد أنه تم بيع حق البث لقناة من القنوات، ولا عندو معلومة رسمية بتوقيع عقد زي ده، ولا بقيمة العقد ده ان وجدت ولا تم معاه إتفاق على نصيبه من العقد اللي بالنسبة للمريخ ما عنده وجود اساسا طالما الإتحاد منظم المسابقة ما أخطر المريخ رسميا بوجود عقد تم بموجبه بيع حق البث لمنصة تاسيتي أو غيرها وبالتالي ما مفروض تكون في أي كاميرات بث موجودة في الملعب..

طيب الحل شنو؟
الحل بسيط جدا، الإتحاد يطلع المريخ على العقد ويتفق معاه على نصيبه بشكل رسمي وبالورق ما بالكلام ساي وتتلعب الكورة عادي وتتنقل وبالهناء والشفاء للجميع.. ما حصل الكلام ده المريخ يرجع الفندق وبالهناء والشفاء للإتحاد وتاسيتي بث تمرين الهلال.. وبس
……

#منصة_اشواق_السودان