(سحميات)
*ناقوس خطر في الخرطوم*
*قراصنة الاراضي عادوا مره اخري*
لحدي متين منتظر الكارثة تدق بابك
ولا تتحرك
هسي قبل اسمك يتكتب في لستة الضحايا
الكلام الجاينا
ما إشاعة
ولا ونست مجالس
دي صرخات حقيقية موثقة موجعة
شكاوى زي المطر
في بريدنا وملفات تقشعر لها الابدان عنوانها واحد *قراصنة الأراضي رجعوا
المرة دي
أجرأ
وأدهى
وأخطر
بيوتكم البنيتوها بعمركم كلو ممكن ما تكون باسمكم زي ما قايلين
المصيبة الأعظم العصابات دي بقت ما شغالة في الضلام بس
مدت خيوطها العفنة لحدي جوه مكاتب مصلحة الأراضي المفروض تكون الحصن الأول
فيهم الموظف النايم في العسل وفيهم المغشوش وآخرين عارفين اللعبة القذرة كويس
يا مواطن ولاية الخرطوم
ما تأجل لحظة
ما تتردد ثانية
ما تصدق الطمأنينة الكضابة
قوم هسي حالاً راجع ورق بيتك دقيق
اتأكد
اسأل
ما تفترض
أي شي بخير وانت نايم
الحقيقة المرة ممكن تطلع انت الضحية الجاية وانت آخر من يعلم
*وللسيد رئيس مجلس الوزراء الموقر*
دي ما قضية عادية تتدس
في الدرج
ولا ملف يتأجل لبكرة
دي قنبلة موقوتة لامسة أمن الناس واستقرارهم وكرامتهم
اتحرك فوراً الليلة قبل بكرة
اضرب بيد من حديد
ما بتعرف الرحمة
اقلع السرطان العفن ده من جزرو
نضف المؤسسات وسخها شدد الرقابة
واصدر قرارات حاسمة قاطعة تحرق العبث المنظم ده حرق
أما نحنا فقد
بلغنا ووفينا
وح نفضل نكتب ونكشف وندق الناقوس لحدي ما الحقيقة تطلع زي الشمس
ولينا عودة قريب وبالمستندات والادله المدهشه
*همسة في أذن والينا الهمام*
الشاحنات المصرية الثقيلة بدات تدخل بالأحياء
خوفا من المرور ماذاد خطرا علي مواطني امبده وتكسيرا للطريق
وبس خلاص
(والباعنا بنبيعو
بي رخصه ماغالي
والخت نفسو عدو
بنرشو طوالي
والله يكون في عونو البختو في بالي )
(سحمي)
.
