*(( جمعة التوبة ))*
تقول النكتة أن مسؤولا في حكومة الإنقاذ قال لأحد أبناء شرق السودان .. الجمعة الجاية دي عاوزين نعمل حملة إستغفار .. فرد أدروب :
*(( إستثمار براكم..إستغفار تنادونا)* 🤔😁
*(( جمعة الإستغفار))*..
في الجمعة السابقة نشرت مقالا بعنوان *((توبة جماعية))* فرد علي أحدهم انتو بس فلاحتكم في الشعب الحيطة القصيرة ..بما معناه خلوا الجيش يتوب أول !!!🫤😏
عرفتوا الهزيمة بتجينا من وين ..؟؟
منشور عادي يدعو كل الناس جيش و شعب للتوبة الجماعية و ذكرت ذلك بالحرف شعب و جيش .. ياخي الدعوة للتوبة دي مطلوبة حتى لو مافي حرب ..وين المشكلة ؟؟.. و بعد دا ينط واحد يقول ليك لا خلي الجيش يتوب أول .. ؟.🤮
طيب لنفرض ناس الجيش تابوا و جاء دور الشعب للتوبة ..
المواطنين ح يقولوا ناس الأحزاب يتوبوا أول …
و في الأحزاب الكيزان و القحاتة أي واحد ح يقول للتاني أنتوا تتوبوا أول لانو إنتو سبب الحرب ..🫥😏🐸..
و في القحاتة أي حزب حيقول للتاني إنتو تتوبوا أول ..
و في الكيزان الشعبي و الوطني أي واحد حيقول للتاني إنت تتوب أول…
و في الشعبي ح يتقسموا قبايل و أي قبيلة تقول للتانية إنتو الأول .. و في القبيلة أي بطن تقول البطن التانية أول و هكذا ..
يا عالم ..!! 📢
ح نتعظ متين .. ؟
بعد الحصل دا كوووولوا لسة الناس ما اتعظت..
ح نفهم متين إنو دي عمايلنا كلنا شعب و جيش السببت الحرب..؟؟ متين حنفهم؟؟ … يوم القيامة ؟؟
*التوبة ليست شفاهية فقط ..*
التوبة ليست أن نقول نستغفر الله و نتوب إليه ..
التوبة هي أن نقلع كلنا شعب و جيش عن المعاصي و الذنوب و العنصرية و التخذيل و الدعوة للتفرق و أكل مال السحت و الكذب و الغش ..و ..و..و… اي واحد عارف ذنوبو بينو و بين ربو ..
و ..
*((تداول الشائعات..))* دي برضو من الذنوب و الكبائر خاصة الأيام دي و جاينها في مقال براهو..
لو في خبر ما متأكد منو ما تلفحو تنشرو في القروبات ..أصلا إنت بتستفيد شنو من نقل الأخبار صحيحة كانت أو كاذبة .. إنت وكالة الأناضول ياخي .. !!!؟؟؟
فلنجعل من كل جمعة يوما للإستغفار (( الحقيقي)) و التوبة من الغش و الخداع و أكل مال السحت و نشر الأخبار السالبة حتى و إن كانت صحيحة ..و نحاول ناكل حلال *(( أطب مطعمك تكن مستجاب الدعوة..))* .و بعد أن يطيب مطعمنا من الحلال و إن كان ((كسرة موية )) و نواصل في الإستغفار و الصدقة و التكاتف و التعاون و التبرع للنازحين و إيواءهم خاصة مع دخول فصل الشتاء و التبرع لهم و للقوات المسلحة و المستنفرين بالتسليح و بالأموال و شراء السلاح و التاتشرات و الدوشكات و كل ما يلزم للجيش و للمقاومة الشعبية المسلحة ..
كل منا يجب أن يفعل ذلك بينه و بين نفسه كل يوم جمعة و يراقب و يجرد حسابه مع ربه و يقيم *((مسار التوبة ))* من الجمعة السابقة و حتى الجمعة الحالية ..
لان *مسار التوبة هو الذي يحدد مسار الحرب..* كما قال سيدنا عمر بن الخطاب في ذات المعنى..
أي واحد فينا يجرد حسابو الإسبوعي هل تخلى عن الذنوب و المعاصي و الكذب و الغش و أكل السحت و ..و..و.. التي كان يرتكبها في الإسبوع السابق .. ؟؟
و بالمقابل فإن على الجيش أن يحدد متحدثا رسميا يخرج في تلفزيون الدولة الرسمي في لايف قصير يوميا لينور الناس بالمستجدات و خطط الجيش و ما هو المطلوب من المواطن بما لا يتضارب مع سرية العمل العسكري..
استغفرالله العظيم و اتوب اليه…
تصبحون على توبة نصوح..
*كتبه بإخلاص: محبكم الفقير لله (المذنب):*
*د /محمد صالح الشيخابي..*
الجمعة 5 يناير 2023
