عامر السيد (عامرون )يكتب :
في حضرة الشهيد عمر النعمان ..
مابين عمر وعمر
ونحن نستعد لتجهيز استديو البث لبرنامج (انفاس الورد )وهو برنامج صباحي مباشر من الثامنة صباحا الي العاشرة بقناة طيبة من مقرها بالصحافة ..قالي لي الاخ عمر الجعلي ابن حي الصحافة وهو المسؤل عن الاستديو الرئيسي في قناة طيبة (الليلة جاي حلتكم لحضور مناسبة ) انتظرني عشان داير اعرفك بواحد من ناس (العشرة) ساكن جنبك هو بره الخرطوم لكن جاء إذن لازم نقابلوا قبل ما يرجع ..سألته اسمو منو قال لي انتظر لحدي ما تقابلوا..راجل كاااارب وأخو اخوان ..وصاحب مواقف انسانية ونكران ذات ..وضحك حتشكرني كتير عشان عرفتك بالراجل ده لانو زول خدوم ..
بالفعل التقيت بالاخ عمر الجعلي في محطة العمودين في العشرة واتجهنا شرقا وبعد خطوات قليلة وصف لي بيت وقالي داك البيت قلت ليهو ده بيت ناس اسامة النعمان قال لي اي ..في العشرة معظم الشباب بعرفوا اسامة وأحمد وبعضهم تتلمذ علي يد الاستاذ عثمان النعمان ..
وصلنا الي البيت وقد اتصل عمر الجعلي بصديقه عمر النعمان الذي قابلنا في الباب صحيح اعرفه لكنها معرفة عن بعد .. اعرف شقيقه اسامة أكثر منه ..قابلنا والإبتسامة تعلو محياه وعانق صديقه عمر الجعلي .. كانت ثاني مرة مرة اجلس فيها مع الشهيد عمر النعمان المره الاولي كانت في وفاة أحد والديه حيث حضر وقتها الي منزل الأسرة بالعشرة مربع 11 الفريق صلاح قوش للعزاء عندما كان مديرا لجهاز الأمن ..كان الاخاء في الله بين عمر وعمر عميق جدا وذو خصوصية ادركتها في هذه الجلسة ..
نسأل الله أن يتقبل شهيدنا عمر النعمان قبولا حسنا في الفردوس الاعلى مع الصديقين و الشهداء..وان يربط علي قلوب أهله وأصدقائه واخص منهم الاخ عمر الجعلي .
الخميس 5/9/2024م
