ابراهيم عثمان يكتب
نصائح للقحاطي المحايد
*عشان تخدم فكرة إنك محايد لازم تترك طريقتك الحالية في التعاطي مع الحرب وتعصر على نفسك شديد وتعمل ليك كم حركة لزوم الاقناع وكده :*
* *إذا لاقاك مستشار أو إعلامي دعامي متلبس بكذبة ظاهرة مفضوحة حاول قول الكلام دا كذب .*
* *من وقت لآخر أنقل ليك فيديو يوثق لجريمة من جرائم الميليشيا، وألعن الميليشيا ذاتا لأنو حكاية لعن الحرب بقت حيلة مستهلكة .*
* *حاول تعصر على نفسك شديد ومن وقت لآخر تنقل ليك مقال من المقالات البتوثق لقصص معاناة الناس من إجرام الميليشيا .*
* *إنت ذاتك لو الدعامة عملوا فيك حاجة : احتلوا بيتك، نهبوك، دقوك، أي حاجة، حاول إنك ما تدسها، أحكيها، وما تخاف من غضب الميليشيا لأنو جلدها بقى تخين ..*
* *حاول خلي تضامنك مع المواطنين لما تهاجمهم الميليشيا قوي ومتناسب مع حماسك لمجيء قوات أجنبية للحماية عشان الناس ما يقولو إنو حماسك دا لحاجات تانية حامياني .*
* *زي ما بتهاجم المستنفرين المساهمين مع الجيش في حراسة المناطق الآمنة حاول قدر الإمكان إنك تنتقد المرتزقة والمستنفرين الشغالين مع الميليشيا في احتلال البيوت والنهب والتخريب .*
* *وزي ما بتهاجم الدول البتبيع السلاح للجيش حاول أضغط على نفسك شديد وطلٍّع ليك إدانة واحد للدول البتدعم الميليشيا .*
* *عموماً الاقتراحات كتيرة لكن إنت حاول بقدر الإمكان تغلف مواقفك المنحازة بغلاف حيادي حتى لو كان شفاف وما بغطي كويس .*
