عفراء فرحات تكتب :
بيتي
لما كنته بقفل في البيت وانا خلاص مسافرة جاتني نوبة زعل وبكيت بصورة ما طبيعية !
بكاء شديد ودموع كتيرة وحارة ماعايزة تقيف ، محجن كان بقول لي في التلفون ما تبكي انتي طالعة من بيتك وجاية بيتك …
حقيقي ماكنت برد علي الجملة دي خالص !
باختصار
انا بيتي في السودان في الخرطوم …
بالجد قلبي هناك ❤️
انا هناك حافظة شقوق البيت ، البلاطة النزلت لي تحت ، الشباك العايز مسمار الستارة العايزة تتغير الكرسي العايز غراء ..
الشباك …
والله لي زمن عندي شباك في الصالة مابفتحو عشان في حمام وقماري ساكنين معاي والسنة كلها ببيضو ويربو وانا اعتبرته الشباك ده مستشفي دايات العصافير
((يا قماري ابني عشك قشة قشة وعلمينا سر المحبة واهو جد جد هم ببنو ونحن نبني
دواليب المطبخ ، عفشي ، عدتي ،الكراسي ده كلو جزء مني
ملاياتي الجديدة مفارشي الملونة صواني رمضان شيالات العيد …
انا اشتريت لي صبارة برتقالية ساي وعمري ما مليتها عشان ابوي قال لي لازم يكون عندك صبارة (عادات وتقاليد) لما ارجع حعمل فيها فيمتوو
حمامي وسريري ، كنبة القهوة انواري والسماعة العالية لي قرآن الصباح وفتحت الشبابيك ..
الجاولي واللبان وبخور التيمان …
وبعديها سميرة تغني لي عشرة الايام ….
والعجب لماتغني يوم قسموك ياهم كتبو عليك اسمي!
نصرخ سوا اصلو نحن بنحب الكرب
الفازات السجاد التحف دي كلها عبارة عن انا وبتغني معاي
بيتي هناك ولمة اصحابنا مع الشاي والكيك
بيتنا هناك مع ضحكنا والونسة والسهر ..
دقة العود !
غنيتي واحدة لما تحكي ذكرياتنا
اغاني المحبة!
لمة رمضان ، اعيادنا افراحنا واطراحنا..
والاقاشي البقوم فجأة !!
والفول ابو زيت مطمبج !
الشطة المدقوقة !
والاصحاب البجيبوك لي فتة ، سلطة دكوة
وناس اللغاويس والقهاوي
وشوفت ساعات الضهاري ومحبات القلب
وفجاءة يقولو ليك ياخ خلاص كتمت ، قوم شتت !!!
برانا مفلسين
خيم رمضان والشاي المقنن
وسماحة بناتنا وجلاليب ولفحة شال مطرز يالطيف ..
من نحن صغار
اجازات المغتربين
والهدايا وريحة الشنط
ابوي
ولمة البيت الكبير
قراصتنا والدمعة
ويكة ، ملوحتنا والشطة !
مخلل بلح ..
بيبسي كولا مقفل قزاز ….
ضهر الجمعة سمعنا الخطب
جلابيب اولاد عمي وبخورنا وفستاني الكحلي ابو وردة
اثنين وخميس ابوي صايم ونحن فاطرين
وبدعواتو بس عايشين #
عيد الفطر يعني صباح الشجرة وبس #
الضحية خروفي وخروفك وانا اول وانت اول والرصة معروفه الكبير اول #
الكهرباء قطعت الموية قطعت !
جاز بنزين غاز مافي وكنا عايشين ومبسوطين..
عيش مافي نقلب رز نقلب كسرة مكرونة المهم بتجازف بتجازف
بواقي الاكل حرام تدفق
مرات بنربط في الشجر
ويا بختك لو جاك عابر سبيل
نحن ناس محرية وكلنا ناس كرم وجود
الجيران المساكين والمحتاجين ….
من نحن صغار
صوت حبوباتنا …
افتحو الدواليب وزعو الدلاقين …
في الاستوب
طلعته زيتنا ياخ زح من القزاز
الصوت عالي والنهرة عالية
ياولد تعال هاك امسك …..
مابنعرف لي كسر الخواطر.
نحن حافظين الحفر
والشوارع الكاتمة
ومحلات الشرك #
ياخ نحن بنطلع الشغالة اربعة مرات في اليوم عشان فصيحة وبنرجعها سبعة مرات في الثانية عشان حرام وبنزيد المرتب خوف ساي ( ماهي الدولة العميقة وصمام الامان في البيت )….
كاش مافي نبكي النهار
والليل حايمين في ليالي البروف..
مرة شرحبيل سميرة دنيا ايمان الشريف فرفور
كلو دايسين ❤️
شارع النيل ملوك الفتة العصائر الفطاير والخمج والجغمسة والسنة كلها مسممين وغسيل معدة ومن صيدلية لي صيدلية حايمين وبرضو مبسوطين❤️
جخانين الرياض
قعاد المساطب زاتو حقنا !
شغل لوردات مقفلين …
مرات هيافة ساي نصل شريف جر هواء
بحر الشجرة
والسفن في المرسي …
الري المصري ، وصيد السمك
وشراعات الأمل لونه ابيض
وبحري سر الهواء دي انا لي يوم الليلة بروح فيها
لكن النصيحة ناسه سمحين وقادرين وراقين
ياخ صفقات البزنس زاتو طيب خاطر ساي محشورين ..
اخوي وصاحبك نحن ساي ماضيين
وبالفاتورة قابضين
وتحت تحت شغالين ومسيطرين
اصلو بركة ساي عايشين !
والعجب لما اجر تلفونات السيخ والاسمنت
رد اصحابي واحد …
والله انتي حيرتينا !
المزاج يحكم نلبس براندات وخلفت رجل مكياج ، هاي هيلز ، مطاعم فنادق ونضرب السلفي وراضين ❤️
عمر عشاري ورتينة حايمين ، الالماني ، والقراند
والشعبي زاتو واصلين!
يغنو لينا قلعت الطرحة وغيرت للتوب
نرجع نص الليل والله مطمئنين…
اعراسنا وتيابنا والهيافة فوق وقاعدين …
بتعرفي للسهر ؟
بتعرفي للسهر !
قومي صلي الصبح حاضر …
ياخ تلفونات الليل
مستشفيات وفيات
اعملو صامت !
لاعيب ارد ….
يقولو ليك جار اصحاب ود عمت خال ابوهم مات
تجي وتعزي وتكورك وماعارف المات
نحن حنية حنية حنية لما نقرب نلحق الزول المات
مستشفيات اهل المات
ندق الشير
نرسل شاي
نحشي ساندوتشات
نحن كدة
مسلطين ومسلطات #
كنته بطلع اتمشي في كم شارع حول البيت غبته فترة بتاع البنشر قال لي وين طولتي
تحركات راصدين ..
بتاع الخضار الخرد اللبن السمك المزعجين حاليًا مشتاقين
شغلي # احجاري # ورشتي قاطعة قلبي …
ساعات الشغل الخمسة بتمر علي قطعة من نار
انا مابعرف اعيش من غيري ادواتي احجاري ..
يديني ماعارفة تربط شنو وتربط وين وكيف ومتين
برامج حلقات معارض ايفنتات..
نجاحنا فشلنا
قروشنا حقوقنا
املاكنا بيوتنا
احلامنا
ياخ ، والله جد
اوهامنا ، طلسنا زاتو كلو هناك
ياخ
شفتو كضبنا الواحد ده قاعد براهو زاتو هناك
نحن مسجات الضهب والعوارة زاتو اشتقنا ليها
مساء الالماس علي الانناس
بعد الحرب حنرد عليها
نحن هناك اسياد بلد
عزيزين
كرام اولاد كرام
نايمين حامدين وشاكرين ومستورين
وفي نعيم والحمدلله رب العالمين
وسلامنا لي سيد الغر المحجلين ❤️
هدومي هدومي …
تعبته فيها لفيت بمزاجي ودفعته قروشي !!
شبشبي الاخضر زاتو اشتقته ليهو
شبشب الحمام زاتو عايزاهو
الصباحات
المدارس ..
دقة الجرس
انا مابرجع زول ..
الغداء !
الليلة زاتو مافي غداء
روحنا محرقانا ….
صينية كبابي شاي
بسكويت بركة كلو ملح !
كدة كفاكم.
يشهد الله ضغوطات #
التلاجة فاضية البقالة الدكان ، اللسته ( ده كلو مابجيبو مافي ميزانية !
انتي فاضية من الفارغة لكن
صرفتي كم
سؤال المشاكل ولوية البوز شهر
ملوك الفارغة #
انا هناك اول الشهر بعمل حسابات البيت ظروف
عشان نص الشهر اسوط الحسابات دي علي الراجل ده فوق تحت وقروشي وقروشك وقاعدين ملوك
نحن هنا ظرفنا واحد والقلب يالطيف خوف ساي قرب يقيف !
تعالي امدرمان …
ماجاية بعيدة!
دق الجرس
في داعي اهلي كلهم يسكونو امدرمان …
خميس وجمعة ؟
ماعندي طريقة ماشه بيتنا ….
تلفونات الصباح
المسجات
وكمان لما نجي نكبره بنعترف لي بعض
او
قربت عليك وكلو كضب
الواتس اب شهر ماتفتحو بسبب مسج شرك
تقلب ماسنجر !
نحن شدة مافي حته برانا ..
تدخل كلبهاوس
تلقي واحد صاحبنا عامل روم جر هواء عن الملحدين
وزول بكورك :
والله العظيم والله العظيم والله العظيم انا ملحد
اجي / و الله !!!!
وملحد ؟
كدي ياجوكي اهداء
اصلو نحن مسلمين بالفطرة
قروبات الفيس
احترس امامك كشة !
وحقوقي
والنسابة والغلابة
وانا سمحة وصغيرة ومجيها وعرس فيني
والمشلوب!
شغال شيشه
وحريق وويست
وصفرجت #
وعصابة الرداء الابيض سوف تحتل العالم !
المشلوب ده في الاساس جنازة بحر #
مصاريف مدارس اكياس رغيف رز بسكويت
ديون مصاريف
كهرباء
مدارس والهم مخيف!
ويقول ليك انا بكرة عريس ♂️
ياخ الناس دي هناك شدة ماطيبين لما يزعلو من بعض بقفلو التلفون في وش بعض عشان مابعرفو للكلام الحار لا سمع لاقول !
وينسوا الشكلة زاته …
وبكنكشو في قفلت التلفون ٣ شهور !
اظن نحن من الشعوب البسيطة لسه في كراس في البقالة للدين
والله من كتر ما بنحب بعض بنقري بعض ونكبر بعض وبنعرس لي بعض وبنموت سوا وبندفن بعض #
نحن التفاصيل الصغيرة دي بتقتلنا وبتختنا رماد وكمد
وتفاصلينا كتيرة شديد ما بتتحكي والله ما بتتحكي ..
مصر …..
اي بنحب مصر …
لكن !
لكن !
نحن قلوبنا في بلدنا وعلي بلدنا
نحن ما بنطيب من غير بيوتنا
نحن مابنطيب من غير اهلنا
ونحن مابنطيب من غير شغلنا …
ياخ …
بنكك قفل كلنا اتجهجهنا !
طيب لو كمل …
بكل صراحة مصر بالجملة حتطردنا #
ما القصة انت عندك بيوت وين !
الفكرة انت وين !
ولما تطلع بمزاجك لا مجبور لا غصب عنك لا مضغوط وتفكر وتخلف رجلك وتقرر انك تمشي وين !
انا بيتي هناك وانا هناك وروحي هناك وشغلي هناك وعقلي وحياتي هناك وقلبي هناك …
وسماحتي وروقتي ودي اخر صورة لي وانا هناك وطال الزمن او قصر انا راجعة هناك ❤️
كسرة :
شفتو العروس المشت برج إيفل وضربت تطمن علي اهله وصرخت وقالت الله …
راجله قال ليها مالك ؟
قالت ليهو اهلي في رحلة في الجبل
دي انا زاتي #
ونحن ملوك الدنيا بالواضح والمدسي ونحن هناك ❤️
راجعين #
عفراء فرحات ….
