دبوس حااااار د. أحمد منصور المحامى يكتب : *محلية أمبدة هى المحلية الوحيدة المظلومة فى السودان …*

دبوس حااااار
د. أحمد منصور المحامى يكتب :

*محلية أمبدة هى المحلية الوحيدة المظلومة فى السودان …*

هى طبعاً أول محلية قاتلت المتمردين …
وهى أول محلية قدمت شهداء مقاتلين …
فلماذا نكافأها بأن تكون آخر محلية يتم تحريرها فى السودان ؟؟؟
*أمبدة ثبات وصمود ورجالة …*
وأولاد أمبدة الما برضو الحقارة …
هم بلو الدعامة …
وسكتو الحكااامة …
*يا ناس هووووووى …*
بكرة ما ينط لينا واحد ويقول :
ناس أمبدة سرقو اموالنا …
*لأنووووو …*
*ناس أمبدة أشراف ونضاف …*
*وناس أمبدة أطهار وعُفاف …*
*وشباب أمبدة بى أرواحهم ودماءهم حرسو مالهم وشرف نسوانهم …*
*ولكن …*
صارت أمبدة اليوم مستنقع ومأوى للمتمردين الفارين من جحيم الجيش السودانى وقد أتوا إلى محلية أمبدة من كل بقاع السودان عدا الولايات الغربية محملين بالمنهوبات والمسروقات مشحونة فى الدفارات والجامبوهات …
*… أخيراً …*
*يا جمااااعة …*
هل تعلموا بأن معركة الكرامة مدورة ومولعة وجيوشنا متقدمة ومنتصرة فى أكثر من 27 محور …
ولكن محور أمبدة المحور الوحيد لليوم القابع فى نقطة واحدة …
وناس تكساس ( المهندسين ) ثابتين فى مكان واحد ولم يتقدموا للان ….
ناس القيادة الغربية لأمدرمان بقيادة سعادة اللواء الركن *حاتم أحمد محمد* أبن أمبدة وأسدها ومعه أركان حربه الأبطال قد اكملوا مهامهم على أكمل وجه وهم فى إنتظار ناس تكساس يفارقوا الصينية بتاعة المنصورة حتى يلتقوا فى النقطة المحددة لإلتقاء الجيوش …
ومن ثم يتم الإنقضاض على سوق ليبيا وسوق أبوزيد وسوق قندهار ودار السلامات والقضاء نهائياً على المتمردين فى ولاية الخرطوم …
*ليكم الله يا ناس أمبدة …*
كل المحليات فى السودان إلتقت بجيشها جيش السودان العظيم ونزلت دموع الفرح من الملايين عدا أنتم …
كان الله فى عونكم يا مواطني محلية أمبدة الأبطال …
حتى الإعلام الرسمى فى البلاد حاصر برامجه فى أشخاص معينين ولا يتعداهم فى كل لقاء …
وحصر لينا أمبدة فى منطقة ضيقة جداً من المحلية العملاقة وكل الناس حفظوها ذى جدول واحد وخمسة عشرة وحداشر …
*يا ناس الإعلام الرسمى ما تخمونا بى حبة لقاءات …*
وين برنامجكم برنامج أفراح فى زمن الحرب من أفراح مواطني محلية أمبدة …
وين برنامجكم برنامج الكاميرا الحوامة (الجوالة) من الحوامة فى محلية أمبدة …
وين يا ناس القنوات الفضائية الرسمية زياراتكم لرموز محلية أمبدة الصامدين الراكزين كما فعلتم مع رموز المحليات الآخرى …
وين الإعلام الرسمى من تكايا محلية أمبدة كما تفعلون يا ناس القنوات الرسمية مع التكايا فى باقى المحليات فى الولايات السودانية …
وين زياراتكم لمدراء الوحدات الإدارية فى المناطق الآمنة لمعرفة أحوال ناس أمبدة …
*لكن نقول الله في …*
يا ناس أمبدة هوووى قالوا البكاء بحررو أهلو …

*️د. أحمد منصور المحامى …*