منصة السودان الأولى
التواصل الاجتماعي
آخر الأخبار
وبرغم التوقع۔۔۔ عبد المعز حسين مكابرابي استراتيجية العلاقات الخارجية وكيفية توظيفها في البناء النهضو... وبرغم التوقع۔۔۔ عبد المعز حسين مكابرابي استراتيجية العلاقات الخارجية وكيفية توظيفها في البناء النهضو... البعد_الاخر مصعب بريــر المخدرات في زمن الحرب.. حين تصبح الوصمة أخطر من الجرعة والورشة اختباراً للإر... *وجه الحقيقة | د. إبراهيم شقلاوي* *اعتقال هارون.. حسابات الأمن والسياسة* *أفق ثقافي توفيق جعفر *إشتجار الاسئلة الكبري :* *من نحن ولمن يكتب ..!؟* *قوافل العطاء تواصل رحلتها… لليوم الثاني في نهر النيل..700 مستفيد و139 حالة مياه بيضاء في مخيم سيدون... *كتب عادل الباز* *دقّ الناقوس.. فمن يسمع؟* *خبر وتحليل | عمار العركي* *من أسمرة.. خطوة دبلوماسية مهمة في اتجاه أوروبا* *خبر و تحليل | عمار العركي* *بانورامـا ستين يومـاً من الحرب الإثيوبية* *اتساع الجبهات الداخلية وتص... *الإرشاد.. طريق الوعي وبناء المجتمع* *مفهوم الارشاد* *عقيد م دكتورة فائزة الزين عبد القادر هجو...

*اكذوبة.. أسمها السودان ..!!* سلسلة مقالات : ( نحن و الوطن) الحلقة ( ١ – ١٠ ) : * ✍ *د . محمد صالح الشيخابي..* التوقيع : *بدل شايك حتشرب دم إذا قلت الكلام الني..*

0

*اكذوبة.. أسمها السودان ..!!*

سلسلة مقالات :
( نحن و الوطن) الحلقة ( ١ – ١٠ ) :

* ✍ *د . محمد صالح الشيخابي..*

شيخابي

التوقيع : *بدل شايك حتشرب دم إذا قلت الكلام الني..*

 

 

*اكذوبة.. أسمها السودان ..!!*

سلسلة مقالات :
( نحن و الوطن) الحلقة ( ١ – ١٠ ) :

* ✍ *د . محمد صالح الشيخابي..*

التوقيع : *بدل شايك حتشرب دم إذا قلت الكلام الني..*

*(( من صدى أغنية قديمة لسيف الجامعة))*

* أعلم أن العنوان صادم ..مر .. مرير … عسير البلع .. و لكن هذه كلها مواصفات شيء واحد فقط .. الحقيقة… !!!
* و ..

حقائق مؤلمة أفضل من أوهام مريحة…!
فإلى المقال :

في البداية اقول لك عزيزي القارئ إذا كنت من نوع (وااا اسفاي لو ما كنت من زي ديلا ) أو من نوع ( نحن أعظم شعب سلخنا جلد النمل و حلبنا لبن الطير ) و مقتنع بكدا ..و لسة عاوز تغش نفسك .. ف ..فضلا ً هذا البوست لا يعنيك …

هذا البوست لإيقاظ النائمين الذين يرغبون في الاستيقاظ و ليس في مواصلة النوم ..

عندي شوية تعريفات كدا غريبة شوية للوطن .. غريبة بس صادقة و متأكد انكم حتفهموني صاح :

*سبعة تعريفات للوطن* :
١/. *الوطن قيمة في نفوس أولاد وبناتو* قبل ما يكون خريطة و حدود جغرافية ..

فهل نحن نستشعر قيمة الوطن في دواخلنا و في اعمالنا و يومياتنا.. ؟

٢/ *الوطن هو التفكير الجماعي*
فهل نحن نفكر سويا ً ام أن كل منا مشغول ببيته و قبيلته و – على الأكثر – حزبه .. ؟؟

٣/ *الوطن هو *(( حاصل مجموع تصرفاتنا عبر العصور و الحقب المختلفة))*
ف … أنظر حولك و … *((( قول انت بقى )))** !!!

تقري ولدك احسن قراية و تقول ليهو بس شرطي معاك يومك التعمل الدكتوراة تسافر تشتغل برة .. دي ما بلد دي ..!!
بتفتكر دي حالة فردية و هجرة ولدك ما بتؤثر في البلد ؟؟ .. اقول ليك معظم السودانيين بقولوا لي أولادهم كدا …

حتقول لي دي ( بلد ما بتقيم الكفاءات ) ؟ .. حأقول ليك دي بلد ( ناسها) ما بيقيموا الكفاءات .
٤/ *الوطن هو عدم صفق باب المكتب و عدم زيادة تذكرة الحافلة و البص و تذكرة الدكتور*
٥.*( الوطن هو الضمير الحي و الإخلاص في العمل)* :
بترزع باب المكتب بعنف .. رزعتك فاكرها ما بتؤثر ؟؟.. طيب لو مية شخص خلال ٥ سنة رزعوا الباب حيتكسر في ٥ سنة بدل يعيش عشرة سنة ..

بتنوم في الشغل و تجي متأخر و تطلع بدري و الفترة البتقعدها مافي إنجاز حقيقي فاكر نفسك براك المتقاعس و الشغل ما بتأثر ؟؟؟ .. لا ياخوي .. زملانك كلهم سجمانين و مرض زيك كدا..

البلد دي عندنا مجرد محطة بنقري فيها أولادنا و لمن يكبروا بنصدرهم الخليج يمتص شبابهم و خبراتهم لأنو ( نحن ) ما قاعدين نقيم الكفاءات مش البلد ما قاعدة تقيمهم .. الخليج و أوروبا يستفيدوا من كفاءاتنا و يجونا راجعين بعد سن المعاش الواحد يعمل عمارة و يطلع قدامها الكرسي و يباري الضللة و الكوتشينة لآخر عمرو و البلد تكون ما استفادت من كفائتو اي شي ….

*٦. الوطن هو مجموع تصرفاتنا( تاني)..*
٧. *الوطن بيت ملك ما بيت ورثة و لا بيت إيجار ..*
فهل نتعامل مع الوطن ك(بيت مِلك) لنا جميعا ً … ؟،

للأسف: بالتعريفات أعلاه و اظن أن كثيرا ً منكم يوافقني على معظمها . .حسب التعريفات أعلاه نصل إلى نتيجة واضحة نخشى جميعا ً الإعتراف بها : و هي أنه ببساطة لا يوجد ( وطن ) إسمه السودان …
الحقيقة أنه يوجد يوجد ( مكان ) اسمه السودان. يعيش فيه أشخاص متنافرون متباغضون أنانيون كسولون لا يجمعهم شيء سوى بضعة اغاني وطنية يلوكونها كل عام في عيد الاستقلال الذي هو كذبة أخرى … مكان إسمه السودان يعمل كل من فيه لمصلحته فقط ..

الوطن عندنا زي بيت الورثة اي زول يشيل منو الدايرو و يمشي يصلح بيتو هو …

الوطن عندنا زي بيت الإيجار و في الإيجار زي بيت العزابة نطلع منو الصباح اي زول في معايشو و نجي آخر الليل نلعب فيهو كوشتينة و نشرب ( شاي .. على أحسن الفروض ! ) و ننوم فيهو و الصباح نقوم نتف السفة تحت السرير و نجري لي شغلنا …

الوطن عندنا بيت عزابة و بيت إيجار كمان لا بنهتم بي حيطتو المكسورة و لا حمامو الطافح و لا كهربتو الضاربة طالما ما ناوين نستقر فيهو .. يعني ما ناوين نتخذ منو وطن .. !!

و .. بالمناسبة… مصر و باقي الدول ما قاعدة تسرق مواردنا .. نحن القعد نسرق مواردنا و نبيعها لي مصر و بقية الدول بثمن بخس .. و كنا في وطننا من الزاهدين..!!

الأوطان لا تُبنى بالأغاني فقط ..
بدل نحلم و نغني و نقول فلتدم أنت أيها الوطنووووو ..
أحسن نقول :
فلنُعِد تعريفك في دواخلنا .. أيها الوطن ُ .

*خاتمة* :
عذرا ً لكل هذه الانتقادات القاسية و لكن الأفضل لنا هو انتقاد الذات وانتقاد المجتمع بدلا ً عن انتقاد الحكومات و الدول الأخرى ..
الناس البنتقدوا الحكومات كثيرين .. كدي نجرب ننتقد هذا المجتمع ( الرمتالي) الذي بلا شك سوف ينجب حكومات فاسدة على مر العصور…

و …
تصبحون على وطن ..

محبكم الفقير لله:
د. محمد صالح الشيخابي..
٩ أغسطس 2025

اضغط هنا للانضمام الى مجموعاتنا في واتساب

اترك رد

لن يتم نشر عنوان بريدك الإلكتروني.