د. محمد صالح الشيخابي يكتب :
جهزوا ((ضمائركم)) لا ((حقائبكم)) للعودة..
هل كان السودان أكذوبة كبرى عشناها جميعا و أفقنا منها على صوت المدافع و الدانات يوم اندلاع الحرب ..و عرفنا قيمته الآن بعد اقتراب النصر ..
الوطن .. أكذوبة ؟؟ كيف يكون هذا .. ؟
إصبروا حتى نهاية المقال و هو ليس بالمقال الطويل ..
الوطن ليس مجرد خريطة و حدود جغرافية …
الوطن(( قيمة )) في نفوس ابنائه و بناته قبل أن يكون دولة و علما و سيادة ..و الوطن (( شعور )) و (( وجدان جمعي )) ..
فهل كنا نشعر بالوطن في عملنا و أكل عيشنا ..
من الآخر .. لو الحرب وقفت .. نبطل اللولوة الكنا بنعمل فيها دي ..!!
أوع ترجع بعقليتك القديمة .. و لا الحرب ح تقوم تاني و ح يظهر مليون حميدتي و مليون (( كيكل )) .
و ما ابرئ نفسي ..
ما تعملوا رايحين و ما فاهمين ..
محاولة كسب أكبر كمية ممكنة من المال بأقل جهد أو بدون جهد و عمل من الأساس ..
اكل مال السحت بطريقة مباشرة أو غير مباشرة .. هو إسهام في الغلاء و في تمزيق الوطن ..
الدولة التي تعين المتمردين وزراء و تهمل البروفيسورات و العلماء و المعلمين فتتلقفهم دول الجوار معنى هذا أن قيادة الدولة نفسها لا تستشعر قيمة الوطن في داخلها و بالتالي ليس لديها وطنية ..
و ..
لوح التلج بي الفين جنيه … في رمضان و في الصيف مع قطع الكهربة يعملوه بي ١٦ الف ..!!
موسمك اضرب ضربتك .. شعار كل سوداني إلا قليلا !!
بتاع الهايس يخزن حافلتو في الضل للساعة 2 وقت الذروة و يدبل السعر ..
و ..
ضابط إداري في المحلية في خور جمب بيتو يجمع المياه الراكدة و البعوض .. واحد قال ليهو ياخ كلم ناسكم ناس المحلية يغطوا الخور دا بي الأسمنت ..
اقسم بالله قصة حقيقية .. الضابط قال ليهو انت عوير و لا شنو .. الخور دا أنا بنيت منو بيتي دا كلو و لسة فضل لي طابق .. !!!!!
عدييييل كدا و لا داسيها .. يعني ميزانية ترميم و بناء الخور بطبقة اسمنتية كل سنة بتطلع من المحلية و صاحبنا بكبها في بيتو … !!!!!
تقول لي الحرب تقيف .. أو لو وقفت ما ترجع … ؟؟؟؟
و ..
الأخصائي يجي المستشفى ساعتين في الأسبوع و عيادتو مدورة صباح و مسا كل الأسبوع و التذكرة بالشي الفلاني و العمليات الجراحية بالمليارات ..
النماذج كتيرة و الوجع راقد و الخلل فينا نحن حكومة و شعب ..
لا اريد أن أفسد فرحة الشعب باقتراب النصر و لكن جهز شنطة العودة للديار و جهز جنبها شنطة تانية لإعادة النزوح لأن حميدتي الجديد الموجود بيننا يجهز للحرب الجديدة مالم نعي الدرس ..
يلزمنا أن نخوض معركة كرامة أخرى في دواخلنا و مع ضمائرنا و نترك الكسل و الخمول و الرمتلة جمب ستات الشاي و الحسد و الحقد و العنصرية و الكذب و النفاق و أكل مال السحت .. يجب أن نترك النوم و ننهض .. لينهض الوطن ..
و ..
*(( سأترك معصيتي.. لينجو وطني))*
د. محمد صالح إبراهيم( الشيخابي) ..
21 أكتوبر 2024
