الباشمهندس/ تبيان توفيق :
*حليل الكيزان ….*
اسعد الله صباحكم بكل خير .. انتو عارفين كلمة حليل الكيزان دي هي الكلمة الفي نفس الشعب السوداني كلو . لكن مختشي يقولها ولاسباب عديدة .. لانو الشعب اتخم خمة عدوك من ناس الأصم والقحاته الاحزاب ياخ القحاته الاحزاب غشونا لامن عملنا لي كفة بنطلون حمدوك هشتاق. والله نحن شعب طيب وحمدوك كان بنطلونو زاتو بوجه واكبر منو .. ياخ نحن كنا بنهتف تسقط بس . والكيزان أصحاب العقول الوطنية . كانوا بقولو ثم ماذا بعد أن تسقط وبالمناسبة نحن والقحاته كنا طير .. لأننا ما سألنا نفسنا اها وبعد تسقط
تعرفو السؤال ده كان اهم من السقوط نفسه .. فالسقوط يعني الانهيار . مالم تقع على كرعيك بتقع على رقبتك وتكسرها…
نعم اسقطنا الكيزان والسودان وسقطنا نحن تحت كوم من القمامة والانهيارات المتتالية . لأننا ماسألنا نفسنا . ثم ماذا بعد السقوط .. لذلك سقط السودان .
اسقطنا الكيزان الذين كانوا يديرون أفريقيا سياسيا ولم تحلم تشاد حينها بالتدخل في السودان . فالسودان كان بحننكة الكيزان . يغير حكومات أفريقيا اجمع بل ويؤثر في حركة المقاومة الإسلامية حماس والان سقط الجميع بما فيهم نحن وسقوط مروع
اسقطنا الكيزان الذين كانوا يحركون حميدتي وأصغر شافع في تنظيم المؤتمر الوطني كان يوقف حميدتي كما يرى . كما فعلها احمد هارون حينما اخرج قواته من الأبيض. او كما فعلها في جنوب كردفان غيره
اسقطنا الكيزان عشان العشرة عيشات بجنيه والان اشترينا العيشه بي ١٠٠ جنيه ..
اسقطنا الكيزان عشان الدولار بي ٥ جنيه ووصل خمسين جنيه .. والان نشتريه بي اكتر من الف جنيه
اسقطنا الكيزان عشان حراميه مو صح ياخ نحنا الان القحاته ساعدوا حميدتي على سرقة بيوت الخرطوم بيت بيت .. وحات الله السرقوهو الدعامة ومن عاونهم الكيزان في 400 سنة مايسرقوهو
انتو عارفين الدعامة والمتعاونين سارقين اكتر من 10 طن ذهب مشغول من الخرطوم وسارقين اكتر من 12 طن دهب
خام وسارقين كل أنواع العملات من البنوك وسارقين كل مدخلات الإنتاج من زئبق ويوريا ومخزون السودان الاستراتيجي من السكر والقمح والزيوت والمحروقات..
خلوها سرقة الحاجات التاريخية . وثائق ومتاحف وتاريخ وتدمير هوية ..
يااخوانا بصراحة . الكيزان كانوا ماسكين ليهم بلا . بقوة ماعادية هم الصنعو المارد وهم الروضوهو عشان كده لمن كوركنا تسقط بس كنا ماقاعدين نفكر تقع على رأسها وعلى كرعيها وتراها وقعت على رأسها لامن كسرت رقبة الشعب كلو ..
فعلا حليل الكيزان
حليل الكيزان لانو الحركات المسلحة مابتقدر تقيف في الحياد وهي موقعة سلام زمن الكيزان
حليل الكيزان اللعمنو حميدتي مابقدر يدخل الخرطوم بدون إذن منهم
حليل الكيزان لانو خليل ابراهيم وصل امدرمان زيارة وتاني يوم بقى يفتش في التخارجو
حليل الكيزان لأنهم ما بلعبوا تغلط فيهم بودوك لي الله زي الترتيب مابفرق معاهم انت منو ومعاهم ولا ضدهم
حليل الكيزان اللعمنهم مابلعبو في السودان .. ولا الإسلام
القحاتة كترة ما غشونا عملنا القومة للسودان ويخربنا محل راحت مااتعرفت والكيزان كانوا شيرنيق بطلعو قدر قروش حمدوك جت وقروش السودان جت من أصدقاء السودان والدوحة واحد واتنين تشهد
ياخ نحن حمدوك دفعنا قروش ضحايا المدمرة كول . وهي كملت من الصداء ونحن الكيزان كانوا بطالبوا لينا في قروش مصنع الشفاء
الكيزان قوة عقلية كبيرة . مافكرنا نستفيد منها وخبرات هائلة في السياسة مافكرنا نوجهها لصالح السودان اثنا الثورة لانو كان همنا تسقط بس .. اها بعد سقطت سقط السودان والقحاتة والعسكر والاقتصاد والشعب خلاص افرحوا. مش ده الهدف يا قحاتة الفنادق اتدمر السودان . يلا نغني حنبنيهو بالكلام والخيانة والتشتت
خالد عجوبة . عادي كان ممكن تبقى ثائر لكن تبقى خائن وطن دي براها تخلي الشعب يقول حليل الكيزان
ياخ نحن القحاتة ديل كارزما قيادة ماعندهم عشان كده كان الهرج والمرج بتاعهم بتغطيهو الشعارات حنبنيهو وضو في آخر النفق وللأسف. كان البعض اعزل حتى في القيادة السياسية
ماهي خيانة القحاتة بدت من يوم وافقوا على فض الاعتصام وكباشي كان بلمح وحميدتي بلمح بس بوق القحاته كان مخلينا نسمع شعارتهم الجوفاء وكذبهم المضلل ونحن نهتف تسقط بس
ابنعوف كان مالو عابد وزاهد وعسكري من صميم القوات المسلحة السودانية.. اها غيروهو القحاته بي برهان جاطتها ليكم فوق تحت حتى اسألو بتاع السيخ داك اسمو منو الكان وزير صناعة
كمال عبد المعروف مالو حرر هجليج في ضحوية .
الكيزان ديل كانو ببلو من طرف ياخ ديل بلو صلاح قوش زي ما حصل حاجة . وحات الله الكيزان ديل قوة قدرة سياسية لو ادونا تاني ١٠٠ سنة القحاتة ما نتعلم سنة اولى سياسة
دحين قولوها ساي حليل الكيزان وقولو معاها حليل السودان
ابشركم المعركة قربت تنتهي وحاتنتهي بانتصار السودان . بس لانو القحاته بقولو الكيزان دخلو المعركة . والاسلاميين متحالفين مع الجيش . اذا ده حصل فعلا يا قحاتة ابشروا بالنصر المؤزر اللعمنو الكيزان واقعين نار بموتو فعلا لأنهم بيؤمنوا بقضيتهم ما بيتضاروا. بدقشو الغابات زمان بقيفوا في جوبا مجاهدين ساكت . بقشوها قدامهم أخضر ويابس لامن يقيفوا محل دايرين
الدولة لومابقت عندها قوة ضاربة مؤمنه بقضيتها دي دولة هشة ساكت قاعدة على الهبشة
تخريمة بالله اسي كان في الدفاع الشعبي والسائحون ومجاهدين الطلاب . وقيادة الجيش ناس ود ابراهيم وكمال عبد المعروف وابنعوف وجمال دايات . ومجندين الخدمة الوطنية . وحات الله كان جنودنا وصلو أفريقيا الوسطى خلوها النيجر البجاي دي
تخريمة عاينو يا القحاتة تعالو قولو للكيزان معليش حميدتي اكل العيش . حاربوهو لينا .. شوف البلد تنضف في أسبوع ولا لا ياخ ديل من اخوات نسيبة بس كان بيطلع فيلق
انتو قايلين الكيزان ماعندهم قوة ضاربه وحات الله ود ابراهيم يقول اجمع . في ساعة واحدة السائحون يجوك من كل حدب ينسلون يستلموا الضعين من نصها بس
تخريمة الكيزان ديل انحنو للعاصفة لكن لجان المقاومة وين وين مالا مامؤمنه بالسودان ده ما تقاوم الدعامة ديل ده سؤال ساكت بس اللعمنو لجان المقاومة دي فيسنملأ الطرقات بالتهليل والتكبير والتسبيح والتحميد
وتنتظم الحشود
ونزلزل الأرجاء بركان تفجر بالهتاف الداوي
وتصبح كل عوالم الدنيا شهود
