سحميات
مبارك سحمي يكتب :
*الحج ولا حاجة الوطن؟*
يا جماعة الخير البلد موجوعة والناس تعبانين والدموع في عيون الأمهات ما نشفت
والمآسي في كل زول فقد عزيز في كل بيت فيه شهيد
مفقود جريح
أرملة
أو يتيم ما لاقي لقمة يسد بيها جوعو.
في ظل الحالة دي
واجبنا الوطني والأخلاقي والديني شنو نمشي الحج ولا نقيف مع أهلنا المنكوبين
والله الزول البمشي الحج داير رضا الله
لكن هل ربنا برضى وزول قريبك جعان
ولا رضاه في إنك تقيف مع الضعيف والمحتاج في الزمن الصعب الحج فريضة
لكن لمن يكون عندك قدرة
وما تكون عندك مسؤوليات أكبر وأولويات ملحة
الحج يا أخوانا
ما بس سفر للكعبة
الحج إنك تتقي الله في عبادو الحج إنك تمسح دمعة اليتيم وتقيف مع الأرملة
وتداوي الجريح وتواسي المصاب دا الحج الحقيقي البيرضى الله
البلد محتاجة لينا وكل جنيه اليوم فيهو روح بتنقذ
فيهو وجع بتخفف
فيهو وطن بتبني
القروش البتجهزها للحج السنة دي
شوف لو في زول محتاج أكتر منك
يمكن تكون سبب في حياتو، يمكن ربنا يكتب ليك بيها حج وزيادة.
يا أهل السودان خلونا نفكر بعقل وقلب مفتوح الوضع ما عادي والناس في كُربة وربنا ما بقبل عبادة فوق أنين الجوعى وصراخ المرضى
أسأل نفسك
هل حجيت قلبك أول
هل نفّست كُربة زول قبال تمشي ترفع إيديك بالدعاء
اللهم لا تحرمنا الأجر، واجعلنا ممن يعمرون الأرض بالخير ويواسون أهلهم في البلاء ويفعلون ما يرضيك يا رحيم.
.(و لو داير العباده اكرم والديك
ليهم حق عليك خلي الروح رضيه وكون نفسك ابيه تحقق نعمتين اصدق في كلامك وماتطول خصامك
ولاقي اخوك باش)
.
(سحمي)
♥
✊
.
..
