صلاح التوم من الله يكتب : قبال ده ما حصل علينا لا ماء لا كهرباء لا تلفزيون لا راديو لا مواقع تواصل

صلاح التوم من الله يكتب :

قبال ده ما حصل علينا
لا ماء لا كهرباء لا تلفزيون لا راديو لا مواقع تواصل

* تسبب الدعامة الاشرار قاتلهم الله في تعطيل سد مروي ..
* لايام انقطعت عنا الكهرباء والماء ..
* البيوت عدمت نقطة ماء ونقطة ضوء ..
* اصبح الحلم – جغمة ماء وجرعة رؤية ..
* صارت الموبايلات علب صغيرة عديمة الفائدة ..
* لا تلفزيون .. لا راديو .. لا مواقع تواصل لا ده لا ده ..
* انقطعنا عن السودان وعن العالم كأننا في جزيرة مهجورة ..
* البرهان سافر وجا .. اسرائيل وغزة وقعوا اتفاق .. الخبت والبل والجغم بتاع الجيش السوداني وصل وين ما جايبين خبر ..
* عدم النور بالليل بقت علينا ( عمى كباسة الخلت العصيدة ولحست المواصة ) .. بقينا ( نتطاقش ) زي جريوات الكدايس حديثة الولادة ..
* حليل بطاريات اليد والشمع في الدكاكين قبل ظهور نور الموبايلات الذي اعتمدنا عليه وخذلنا الآن ..
* ده كلو كوم وعدم الموية كوم تاني ..
* الماسورة كانت لو ما بتنقط بتقول اخخخخ .. بقت صم بكم عمي مليسة تب ..
* الناس مرقت في الشوراع الشايل جردل والشايل باغة والشايل برميل هائمة يلفوا ويدوروا ويعودوا والمواعين افرغ من فؤاد ام موسى .. ويمتص العرق ما تبقى من ماء في اجسادهم ..
* شحنة عربة كارو الماء بعشرين الف جنية .. كان يقودها حمار فأصبح يقودها ( تمساح ) .. والما يشتري يتفرج ويتحسر ويمصمص شفاهه ..
* أصبحنا في عرض شوية ماء لشراب الاطفال الصغار .. وللادبخانات .. ولعمل الملاح .. وبل الدقيق .. دكاكين الفول عدم الماء مافي فول .. الفرن مافي رغيف .. تكايا الاكل عاوزة تكايا ماء .. ماء ماء ماء ..
* غسيل الملابس والعدة مافي ليهو طريقة ..
* الاستحمام والغسيل مافي ليهو طريقة .. ريحة الناس بقت ( طير طير ) .. الأزواج في اجازة إجبارية الى اجل غير مسمى ..
* الميت ما معروف يغسلوا بشنو !
* العندو زراعة ، اصحاب المشاتل ، العندو غنم متمحنين ومحتارين يسووا شنو ما عارفين ..
* بناء فصول ومكاتب المدرسة توقف لعدم الماء ..
* عدم الكهرباء اثر على عمل المركز الصحي ..
* عزيزي الوالي الغالي المفضال الجوال الأعزاء أركان حرب الوالي ..
* هذا حالنا لا يخفى عليكم .. ينتابكم الألم مثلنا ..ما بتقصروا وما قصرتوا .. نشهد لكم .. عاوزين فقط تناكر ماء – اذا وجدت – حتى تزول الغمة ..
* سحقا سحقا للاوباش ..
* جيش واحد شعب واحد وطن واحد مصير واحد الله واحد ..

صلاح التوم من الله
الحارة ١٠٠ صحفيين
الخميس ١٦ يناير ٢٠٢٥