خواطر قلم 173
خاطرة فيها نوع من الطرافة
عسي ان تكون يوماً ضمن كتاب عن ذكرياتي
▪️عندي جلابية
بحبها شديد
من أبوي الله برحمة
جناح ام جكو
(ابوي الله يرحمة كان حزب أمة غير منظم محب للصادق المهدي وطريقة تفكيره معظم جلاليبو البلبسة او بهديها لينا انا بذات جناح ام جكو)
▪️والله ما إصدقت بيها
يمكن الا قبل سنتين
والجلابية قديمة
يمكن من بعد التخرج بكم
سنة أهدها لي الوالد
بلتق اخرامها دائماً بصورة فنانة
▪️حتي بعد ما جيت خميس مشيط عزيزة عليا جداً
مرقتها في صناديق الملابس المستعملة وطبعاً دي من الأفكار الرائعة جداً في خميس مشيط واظن في السعودية صناديق الملابس المستعملة
▪️المهم قبال ما آغترب بكم يوم
كدا الشاعر ازهري محمد علي
عندو ديوان بدشن فيهو بأسم
وسيعود قريباً طبعاً شداني العنوان شديد بعدين فيهو نكهة السلفية كدا
▪️المهم قلت امشي بمزاج واقعد ورا واستمتع ومافي زول بعرفني لبست جناج ام جكو وفيها خرم محترم ما لتقتو..
▪️الزمن داك انا من نجوم السودان لكن لحبوبات ونسوان البيوت وناس المعاشات وناس الورديات وناس النبطشيات متابعي برنامج بيتنا انا ذاتي ما كنت بعرفوا كان لمن ارجع من الشغل ام زينب بتحكي لي في برنامج في تلفزيون السودان لقطة جميل اسمو البيت السعيد وحولوا اسمو سموه بيتنا.. اهـ بكون جاي من الشغل بسمع ونستها بنص أضان (توقيتو الساعة 3:00 ظهر وكنت بخش مباشر كل ثلاثاء زي 3:15 فقرة استشارة)
▪️المهم لبست جناح امجكو وام زينب قالت لي عليك الله غيرها بتلاقي زول وبتتحرج والله… ابيت كلو كلو قلت ليها ما بلاقي زول انا حأمشي قاعة الصداقة واقعد ورا
▪️المهم مشيت القاعة والله غني عادل مسلمي غني اول مرة اسمعه غناي غناي مبالغة اتنبئت انو زول دا حيكون فنان السودان الأول زي وردي وكابلي ومحمد الأمين لكن ما شفت ليهو حاجة تاني
▪️المهم لتعترني قعد جنبي واحد بتاع معاشات طبعا اكيد من جمهور برنامج بيتنا ويلا دكتور سامي يا سلاااام وطلع المحاسب اظن في مصنع نسيج الحصاحيصا التلحنت في بيتو كل أغاني أزهري محمد علي ومصطفي سيد أحمد وحكي لي وحكي لي وأصر نمشي المنصة الصفوف الأولي نسلم علي أزهري والبقية
▪️اضطريت مشيت بجلابتي المخرومة والقديمه التقول لايكها الغنماية
▪️وطبعاً عرفني بأزهري بكل فخر وإعزاز دا دكتور سامي لكن اكيد ازهري ما عرفني الزمن داك ما من جمهوري بعدين احتمال أزهري يقول دا من الدراويش البعتقد فيهم عمك المحاسب
مهندس دكتور
ابو زينب
جامعة الملك خالد
الكلية التطبيقية بخميس مشيط
متخصص في السلوك التنظيمى بالمنشأة الصناعية
اعلامي تنمية بشرية وبناء قدرات ايام السودان الي 2013)
26 رمضان 1445 هجرية الموافق
5 إبريل 2024
حي طيب الاسم 10:25 صباحاً
