من واقع المعايشة وبعد عام من الحرب وعام من وجودى فى منفاى.
لاحظت على نحو محدود فى الحرب دى فى علاقات كتيرة اتغيرت وانتهت لأسباب كتيرة وعلى راسها المادية.
فى ناس فقدت روابط رحم وناس فقدت علاقات
صداقة وجوار ومصاهرة ظهرت معادن الناس فى وقت الشدة دى وغاب عن الناس دى انه الرزق بجى مع رحمة واغاثة الملهوف.
وفى نفس الوقت في ناس معادنها ما اتغيرت ومع محدودية دخلها فتحت قلوبها قبل بيوتها للناس
ووسعتهم بأخلاقها ومازالت مستمرة وفى ناس ماعندها
علاقة بناس كتار كانت ليهم عوض وبلسم وبنت لهم
علاقات جديدة ملانة شهامة ومرؤة وكرم أخلاق..
وفى نفس الوقت فى علاقات جديدة اتبنت فرضها
على الناس المكان فيها علاقات حلوة وفيها أصالة
وفى علاقات هشة قامت على مصالح محدودة
وضيقة فرضها المكان دى مابتصمد كتير
لأنها قائمة على مصالح مؤقتة بتنتهي بتغير
مكان الناس دى وانتقالها إلى مكان غير
اها دى فى حد ذاتها ممكن ترمى عليك عبء
نفسي ثقيل يخلق عندك استفهامات ترهقك.
على كل فى الظروف دى ركز على انك تكون
فقط اخلاقى فى تعاملك مع كل زول يقابلك
وفرضه عليك المكان عامله بلطف وبما يرضى
الله وخلى اثر اخلاقك معاه شاهد على صفاء نفسك
وحسن أخلاقك ..
واقعد فى المكان الختاك فيه الزول وماتطالب
باكتر دى مكانتك عنده ماعنده ليك غيرها .
الدنيا دى صغيرة ماتضيعها فى نكد وزعل
د.ناهد عبدالفتاح
اختصاصي نفسي
….
#منصة_اشواق_السودان
