إطلالة
حكايات ود البرعي
عرجون يترنح ..!؟
توفيق جعفر
طرح ود البرعي لضمان شغل عرجون، بل وانهم سيخيرون عرجون بالاستمرار معها أو طلاقها، ( مع العلم انها حامل منه) ، اراح الجميع، فتمتم حاج دفع الله الرجل المسن شاكرا ود البرعي علي مقترحه ..
جيء بعرجون في اليوم التاني في منزل ود البرعي ..!
تحدث ود البرعي بنفس ساخن موجها حديثه إلي عرجون :
_ شوف يا عرجون نحنا اعتبرناك اخونا لامن جيتنا وقعدناك في المسجد، ما بنعرف ليك أهل زاتو ..
خدمت في المسجد، وشاركتنا في السراء والضراء، دحين شيخ إدريس عرس ليك بت أختو، ودا منتهي التكريم، رغم اعتراض اخوها مروان دا، وانت عارف كدا ..
وانا ضمنتك وبقيت وكيلك، ودفعت كل مصروفات زواجك، تجي تعامل بنتنا معاملة كعبة، وتحرج شيخ إدريس، وتحرجني انا وسط القرية دي ..؟
عرجون تصبب عرقا، وأراد الكلام لكن ود البرعي أسكته بقوله اسمع كلامي دا واضح بدل عطالتك دي تمسك لي جنينتي الكبيرة الفيها البقر، ولبنك مجاني شيل ليك اربعة ارطال يوميا، زوجتك حامل، وآخر اليوم المغرب شيل خدار يكفيك، والحبشي الحارس يسلمك يوميا عشرة آلاف، تنشط وتشتغل تمام يزيدك قدام الناس ديل ..
يلا من بكرة تبدأ شغل وننزل بعد تصلي معانا الفجر في المسجد دا ..
وقع ليك؟
تمتم عرجون شاكرا ومقدرا ..
وشوف أي شكوي تجيني من زوجتك والله ما بخليك؟!
لأول مرة أبتسم مروان، وشد علي يد ود البرعي فرحا …
قال شيخ إدريس لود البرعي :
_ عرجون كان عاوز يخرب علي ويبوظ علاقتي بأختي وولدها ..
ارجع ود البرعي المسأله لعطالة عرجون وما لقي زول يوجهو …
وفعلا في اليوم التاني ، كان عرجون منهمكا في عمله منذ الفجر ..
وهكذا حل ود البرعي مشكلة اسرية كبيرة ..!
آخر الأخبار
